Sənaye və energetika

Ana səhifə

Azərbaycan Supsa limanından 600 min barel xam neft partiyasının satışına dair tender elan edib

13 fevral 2009 13:04 (UTC +04:00)

Bakı. Rəşad Süleymanov – APA-Economics. Azərbaycan Respublikası Dövlət Neft Şirkətinin (ARDNŞ) Marketinq və İqtisadi Əməliyyatlar İdarəsi mart ayının 13-14-də Supsa limanından (Qara dəniz, Gürcüstan) 600 min barel həcmində «Azeri Light» markalı xam neft partiyasının ixracına dair marketinq sorğusu elan edib. Bu barədə «APA-Economics»ə ARDNŞ-dan məlumat verilib.
Sorğuya fevralın 16-da yekun vurulacaq və nəticələri fevralın 17-də elan olunacaq.
Qeyd edək ki, Bakı-Supsa neft kəməri ilə Xəzərin Azərbaycan sektorunda yerləşən «Azəri, Çıraq, Günəşli» yataqlarında hasil olunan xam neft ixrac edilir. Yataqların işlənməsində ARDNŞ-la bərabər BP, «Unocal», «Inpex», «Itochu», «Statoil», «ExxonMobil», TPAO, «Devon», «Amerada Hess» şirkətləri iştirak edir. Bu şirkətlər ABƏŞ-in (beynalxalq neft konsorsiumu) tərkibinə daxildir.
Bakı-Supsa boru kəməri 2006-cı ilin sentyabr ayından 2008-ci ilin sentyabr ayınadək təmirə dayandırılıb. Cari ilin yanvar ayında kəmərlə 287 063,6 ton xam neft ixrac olunub.