Sənaye və energetika

Ana səhifə

Səngəçal-Qazıməmməd qaz kəmərinin birinci mərhələsi 2010-cu ilin aprel ayında başa çatdırılacaq

08 dekabr 2009 15:01 (UTC +04:00)

Bakı. Rəşad Süleymanov – APA-Economics. ARDNŞ yeni Səngəçal-Qazıməmməd qaz kəmərinin Səngəçaldan Qalmaz yeraltı qaz anbarınadək olan birinci növbəsini 2010-cu ilin mart-aprel ayına qədər təhvil verməyi planlaşdırır. Bu barədə «APA-Economics»ə ARDNŞ-dən məlumat verilib.

Ötürücülük qabiliyyəti sutkada 5-6 mln. kubmetr təşkil edəcək bu kəmər 1020 millimetrlik borularla çəkilir. Tikinti işlərinə oktyabr ayının 1-də başlanıb. Layihənin iki mərhələdə həyata keçirilməsi nəzərdə tutulur. Yaxın yarım ili əhatə edəcək I mərhələdə magistralın 23 kilometrlik hissəsi tikiləcək. Hazırda layihənin tərkib hissəsi kimi bu kəmərin 23-cü kilometrindən Qalmaz qaz kompressor stansiyasına diametri 700 mm olan borularla şaxələndirilmiş yeni kəmər də inşa edilir.

Qeyd edək ki, bu işlərin başa çatması ilə Qalmaz yeraltı qazsaxlama anbarına vurulan qazın həcmi 2 dəfə artacaq. Layihənin 2010-cu ildə başlanması planlaşdırılan ikinci mərhələsində Səngəçal-Qazıməmməd qaz kəmərinin Qazıməmmədə qədər olan 24 kilometrlik hissəsi inşa ediləcək.