Sənaye və energetika

Ana səhifə

Elşad Nəsirov: «Azərbaycanın Türkiyəyə ixrac etdiyi qazın yeni qiyməti yaxın aylarda müəyyənləşəcək»

09 dekabr 2009 07:47 (UTC +04:00)

London. Vüqar Mustafayev – APA-Economics. Azərbaycanın Türkiyəyə ixrac etdiyi təbii qazın yeni satış qiymətinin yaxın aylar ərzində müəyyənləşəcəyi gözlənilir. Bu barədə «APA-Economics»ə açıqlamasında Azərbaycan Dövlət Neft Şirkətinin (ARDNŞ) vitse-prezidenti Elşad Nəsirov məlumat verib.

E.Nəsirovun sözlərinə görə, hazırda iki ölkə arasında yeni alqı-satqı qiymətinin müəyyənləşdirilməsi istiqamətində danışıqlar aparılır: «Ümid edirəm ki, artıq yaxın həftələr-aylar ərzində qiymət məsələsi həll olunacaq».

Təbii qazın yeni satış qiymətinin həddinə gəldikdə, ARDNŞ rəsmisi bunun bazar reallıqlarına əsaslanacağını və Azərbaycanın Rusiya ilə İrana təklif etdiyi ixrac qiymətinə yaxın olacağını vurğulayıb. «Bizə maksimum qaz ixracının diversifikasiyasını təmin etmək lazımdır», - deyə E.Nəsirov vurğulayıb.

Yeni qiymətin hələ müəyyənləşməməsinə baxmayaraq, E.Nəsirov Türkiyə tərəfinin 2008-ci ilin aprelin 15-dən etibarən Azərbaycandan təbii qazı yeni qiymətlə aldığını və ötən müddət ərzində yaranmış maliyyə borcunun sonrakı mərhələdə ödəniləcəyini vurğulayıb.

Qeyd edək ki, hazırda ARDNŞ Türkiyə və Gürcüstana qaz ixrac edir. Gələn ildən İran və Rusiyaya qazın ixracına dair memorandum və sazişlər imzalanıb. Hazırda Türkiyə ilə qazın yeni qiymətlər əsasında alqı-satqısına dair danışıqlar aparır. Buna qədər Türkiyəyə təbii qaz 1000 kubmetri 120 ABŞ dollarına satılıb.

Azərbaycan Gürcüstana da təbii qazı 2008-ci ilin yanvar ayınadək 120 dollar/1000 kubmetr qiyməti ilə satıb. Qeyri-rəsmi mənbələrin məlumatına görə, Azərbaycan Gürcüstana qazı hazırda 180 dollar/1000 kubmetr qiymətinə satır. Bu il oktyabrın 14-də isə ARDNŞ ilə Rusiyanın «Qazprom» şirkəti arasında Azərbaycan qazının alqı-satqısına dair müqavilə imzalanıb. Müqaviləyə uyğun olaraq 2010-cu il yanvarın 1-dən Azərbaycan Rusiyaya qaz ixracına başlayacaq və gələn il bu ölkəyə minimum 500 mln. kubmetr qaz satışı nəzərdə tutulur. Noyabrın 11-də İranla imzalanmış memoranduma əsasən ilkin mərhələdə ARDNŞ öz payından İrana 2010-cu ildən ildə minimum 500 mln. kubmetr qaz satacaq, sonrakı mərhələdə isə qazın həcmi artırılacaq.