Sənaye və energetika

Ana səhifə

Bu ilin noyabr ayında BTC kəməri vasitəsilə 2,9 mln. ton Azərbaycan nefti nəql olunub

09 dekabr 2009 11:37 (UTC +04:00)

Bakı. Rəşad Süleymanov - APA-Economics. Cari ilin noyabr ayı ərzində Bakı-Tiflis-Ceyhan (BTC) əsas ixrac boru kəməri vasitəsilə 2,9 mln. ton Azərbaycan nefti nəql olunub. Bu barədə «APA-Economics»ə ARDNŞ-dən məlumat verilib.

Oktyabr ayı ilə müqayisədə BTC ilə nəql olunan Azərbaycan neftinin həcmində 10,3% azalma olub. Cari ilin yanvar-noyabr aylarında bu kəmərlə 33,4 mln. ton neft ötürülüb. Ümumilikdə isə kəmər istifadəyə verilən gündən 2009-cu ilin dekabr ayının 1-nə qədər BTC-yə 103,7 mln. ton neft vurulub.

Hesabat ayında BTC kəməri vasitəsi ilə 188,7 min ton Qazaxıstan nefti ötürülüb. Cari ilin yanvar-noyabr aylarında bu göstərici 1,8 mln. ton təşkil edib.

Qeyd edək ki, dəyəri 4 mlrd. ABŞ dollarından artıq olan BTC-nin uzunluğu 1 769 km, məhsuldarlığı ildə 50 mln. ton təşkil edir. Kəmər üç dövlətin – Azərbaycan, Gürcüstan və Türkiyənin ərazisindən keçərək «Azəri-Çıraq-Günəşli» yatağından çıxarılan nefti Aralıq dənizinə çıxarmaq üçün nəzərdə tutulur. BTC-yə ilk neft 25 may 2005-ci ildə vurulub, neft Ceyhan limanına 28 may 2006-cı ildə çatıb.