Sənaye və energetika

Ana səhifə

«Bakı» İstilik Elektrik Mərkəzində təmir işləri başa çatdırılıb

14 dekabr 2009 11:55 (UTC +04:00)

Bakı. Rəşad Süleymanov – APA-Economics. «Azərenerji» ASC-nin «Bakı» İstilik Elektrik Mərkəzində (İEM) təmir işləri başa çatdırılıb. Bu barədə «APA-Economics»ə «Azərenerji» ASC-nin mətbuat xidmətindən məlumat verilib.

Əvvəlki təmirlərdən fərqli olaraq, stansiyada qaz turbini və generatorun əsaslı təmiri aparılıb. Bu məqsədlə turbin hissəsində bütün kürəklər dəyişdirilərək yeniləri ilə əvəz olunub. Xüsusi dəvət olunmuş proqramçılar tərəfindən sistem daha da saz vəziyyətə gətirilib. Ümumilikdə isə işlər qrafik üzrə nəzərdə tutulan vaxtda başa çatdırılıb.

Mərkəzdəki 110 kV-luq yarımstansiyada da təmir işləri həyata keçirilib.

Dispetçer qrafikinə uyğun olaraq, cari ilin yanvar-dekabr ayları ərzində proqnozdan 9,9% çox - 358,3 mln. kVt/saatdan artıq elektrik enerjisi istehsal edilib. İstilik enerjisinin buraxılışı isə 335,8 min Hkal-dan artıq olub ki, bu da proqnozlaşdırıldığından 26,9% çoxdur. Müəssisədə noyabr ayında 28,8 mln. kVt/saata yaxın elektrik enerjisi, 30 min Hkal-dan artıq istilik enerjisi istehsal olunub.

Qeyd edək, «Bakı» İEM-də hər birinin gücü 53,5 MVt olan iki qaz turbin qurğusu fəaliyyət göstərir. Burada hasil edilən buxar «Azərneftyağ» İstehsalat Birliyinin tələbatını tam ödəyir. «Azəristiliktəchizat» ASC də müəssisənin istehlakçılarındandır.