Sənaye və energetika

Ana səhifə

“Azəriqaz” Şamaxı rayon mərkəzinin qaz təchizatını yaxşılaşdırmaq üçün işlər aparır

01 mart 2010 13:41 (UTC +04:00)

Bakı. Rəşad Süleymanov – APA-Economics. Azərbaycan Dövlət Neft Şirkətinin (ARDNŞ) “Azəriqaz” İstehsalat Birliyi Şamaxı rayon mərkəzinin qaz təchizatını yaxşılaşdırmaq üçün işlər aparır. Bu barədə «APA-Economics»ə ARDNŞ-dən məlumat verilib.

Hazırda Şamaxı rayon mərkəzində qaz alan 9 897 abonentin 9 643-ü dövlət hesabına sayğaclaşdırılıb. Rayona 2009-cu il ərzində 31 655,9 kub metr qaz daxil olub, qazdan istifadənin dəyəri isə 70% ödənilib.

Bakı-Şamaxı-Muğanlı yolunun genişləndirilməsi ilə əlaqədar 2009-cu ildə daşıyıcı qaz kəməri Şamaxı şəhərinin ərazisində 8 yerdə dəyişdirilib. Bundan əlavə, Muğanlı kəndi ərazisindəki yeni yaşayış massivində 51 yaşayış evinə qaz xətti çəkilib və sayğaclar quraşdırılıb. Həmçinin 25 ədəd qaztənzimləyici şkafın texniki təhlükəsizlik qaydalarına uyğun yoxlanılması və təmiri başa çatdırılıb, mövcud tələbatı nəzərə alaraq Şamaxı şəhərində 6, Mirikənd kəndində 2 və Sabir qəsəbəsində 1 qaztənzimləyici şkaf quraşdırılıb. Texniki baxış zamanı 100 evin istismara yararsız orta və aşağı təzyiqli qaz xətti layihə-smeta sənədlərinə və texniki təhlükəsizlik qaydalarına uyğun yenidən çəkilib.

Cari il ərzində rayonun vaxtilə qazlaşdırılmış Kələxana, Adnalı, Osmanbəyli, Nüydü, Məlikçobanlı, Dağ Bağırlı, Yenikənd və Göylər kəndlərinə təbii qazın verilməsi, Mədrəsə qəsəbəsində Aşıq Ələsgər, Qaçaq Nəbi, Dostluq küçələrində, Şamaxı şəhərindəki Bakı, M.Ə.Rəsulzadə küçələrində istismar müddətini başa vurmuş, korroziyaya uğrayaraq çürümüş yeraltı qaz kəmərlərinin yerüstü kəmərlərlə əvəz olunması nəzərdə tutulur.