Sənaye və energetika

Ana səhifə

Çıraq Neft Layihəsinin icrası ilə bağlı podratçı şirkətlərlə müqavilələrin imzalanması iyul ayınadək başa çatdırılacaq

10 mart 2010 07:17 (UTC +04:00)

Bakı. Nicat Mustafayev – APA-Economics. Bu ilin ilk yarısınadək «Azəri-Çıraq-Günəşli» (AÇG) yataqlar blokunun işlənməsi layihəsi çərçivəsində yeni Çıraq Neft Layihəsinin (ÇNL) icrasına dair podratçı şirkətlərlə müqavilələrin imzalanması tam başa çatacaq.

«BP-Azerbaijan» şirkətindən «APA-Economics»ə verilən məlumata görə, podratçılar həm yerli, həm də xarici şirktələr olacaq ki, 50-dən artıq yerli şirkətin ÇNL üzrə tikinti işlərində birbaşa və ya dolayısı ilə iştirak edəcəyi gözlənilir: «Əsas podratçılar yerli subpodratçılardan maksimum dərəcədə istifadə etməyə təşviq ediləcək».

Bununla yanaşı, 2010-cu ilin II rübü ərzində layihə çərçivəsində hazırlıq üçün lazım olan material və avadanlığın gətirilməsi, dənizdibi qazma plitəsinin hazırlanmasının başa çatdırılması, II-III rüblər ərzində isə dayaq blokunun hazırlanması üçün Bakı Dərin Özüllər Zavodunun modernləşdirilməsinin həyata keçirilməsi nəzərdə tutulub. Gələn ilin II rübündən etibarən isə 16 quyunu əhatə edən ÇNL öncə qazma proqramına başlanacaq.

Bundan başqa, cari ilin III rübündə layihə çərçivəsində dənizdə dayaq plitəsinin və istiqamətləndirici payaların quraşdırılması, üst tikililərin və qazma avadanlıqları, həmçinin dayaq blokunun hazırlanmasına başlanması nəzərdə tutulub.

Daha sonra, 2012-ci ilin II rübündə layihə çərçivəsində sualtı boru kəmərlərinin quraşdırılmasına başlanması, III rübündə dayaq blokunun dənizə yola salınması, IV rübündə isə dayaq blokunun quraşdırılması planlaşdırılır.

Layihənin növbəti addımı 2013-cü ilin II rübündə yerinə yetiriləcəyi gözlənilir ki, bura üst tikililərin hazırlanması və quraşdırılması daxildir.

Nəticədə, 2013-cü ilin IV rübündə ÇNL layihəsi çərçivəsində ilk neftin hasil olunacağı proqnozlaşdırılır.

Qeyd edək ki, layihə «BP-Azerbaijan» və Azərbaycan Dövlət Neft Şirkəti (ARDNŞ) tərəfindən birgə hazırlanıb. Layihənin ümumi dəyəri 6 mlrd. ABŞ dolları təşkil edir. Ümumiyyətlə, layihənin icrası üçün 1 800 daimi iş yerinin açılması nəzərdə tutulub.

Xatırladaq ki, layihənin icrası üçün artıq sanksiya verilib.