Sənaye və energetika

Ana səhifə

BP-nin «Devon Energy» şirkətinin «Azəri-Çıraq-Günəşli» layihəsindəki payını alması ilə bağlı rəsmiləşdirmə yaxın 1 ilə başa çatacaq

11 mart 2010 14:51 (UTC +04:00)

Bakı. Nicat Mustafayev – APA-Economics. Xəzərin Azərbaycan sektorunda yerləşən «Azəri-Çıraq-Günəşli» (AÇG) yataqlarının işlənməsi layihəsinin səhmdarlarından olan ABŞ-ın «Devon Energy» şirkəti bu layihədəki payını Böyük Britaniyanın BP şirkətinə satıb.

«BP-Azerbaijan» şirkətindən «APA-Economics»ə verilən məlumata görə, BP «Devon Energy»nin Braziliya, Meksika körfəzi və Azərbaycanda iştirak etdiyi layihələrdəki paylarını alıb: «BP Braziliyada həm ofşor, həm də onşor layihələri olan 10 kəşfiyyat bloku, Meksika körfəzində perspektiv ofşor strukturlarını, Azərbaycanda isə «Devon Energy»nin AÇG-dəki 5,63% payını alıb. Bu da o deməkdir ki, BP-nin AÇG-dəki payı 34,14%-dən 39,77%-ə çatıb. Bütün bloklar üzrə alqı-satqı müqaviləsinin ümumi dəyəri 7 mlrd. ABŞ dolları təşkil edib ki, bütün lazımi təsdiqlər və üçüncü tərəfin razılıqlarının əldə olunmasına 12 ayadək vaxt tələb olunacaq».

Qeyd edək ki, ötən ilin noyabr ayında «Devon Energy» şirkəti özünün Azərbaycan, Braziliya, Meksika, Rusiya və Çindəki mövcud offşor layihələrindəki bütün paylarını satışa çıxardığını elan edib. Offşor layihələrinin səhmlərinin satışı isə onşor işləmələrinə yönəldiləcəyi bildirilib. «Devon Energy» yalnız ABŞ və Kandadakı offşor layihələrində paylarını saxlayıb.

Xatırladaq ki, 900 mln. tondan artıq neft ehiyyatı olan AÇG yataqlarının işlənməsi layihəsində BP (operator - 34,14%), «Chevron» (10,2%), ARDNŞ (10%), «Inpex» (10%), «StatoilHydro» (8,6%), «ExxonMobil» (8%), TPAO (5,6%), «Devon Energy» (5,63%) və «Hess» (2,7%) şirkətləri iştirak edir.