Sənaye və energetika

Ana səhifə

Gürcüstanda beynəlxalq enerji konfransı keçirilir

24 mart 2010 12:58 (UTC +04:00)

Tiflis. Nizami Məmmədzadə - APA. Martın 24-də Gürcüstanın paytaxtı Tiflisdə 15 ölkədən gəlmiş 150 nümayəndənin iştirakı ilə neft və qaz nəqli, yeni boru xətlərinin potensialı və təbii qazın diversifikasiyası mövzusunda “GİOGİE-2010” adlı iki günlük beynəlxalq enerji konfransı başlayıb. APA-nın Gürcüstan bürosunun məlumatına görə, beynəlxalq konfrans ARDNŞ-nin Gürcüstan nümayəndəliyinin dəstəyi ilə baş tutub.

Konfransda Gürcüstanın energetika naziri Aleksandr Xetaquri, Gürcüstan parlamentinin Avropa ölkələrinə inteqrasiya üzrə Komitəsinin sədri David Darçiaşvili, Milli Neft və Qaz Agentliyinin rəhbəri Georgi Tatişvili, Gürcüstan Neft və Qaz Korporasiyasının strateji və siyasi məsələlər üzrə müşaviri Teymuraz Qoqitaşvili, “SOCAR-Georgia Gas”ın direktoru Anar Məmmədov, Avropa Birliyinin Gürcüstandakı səfiri Per Eklund və başqaları çıxış ediblər. Enerji sektoruna qoyulan investisiyalar, neft və qaz məhsullarının tranzit ölkə kimi Gürcüstandan Avropa ölkələrinə nəqli, enerji daşıyıcılarının effektivliyi, Xəzər hövzəsi, Qafqaz və Qara dəniz regionlarına sərmayə qoyulması məsələləri barədə məruzələr dinlənilib. Martın 25-də davam edəcək beynəlxalq konfransda enerji təhlükəsizliyi, enerji sektorunun inkişafı, enerjinin paylanması, sərmayələr və digər məsələlər barədə fikir mübadiləsi aparılacaq.

“SOCAR-Georgia Gas” şirkətinin direktoru Anar Məmmədov APA-ya açıqlamasında konfransın hər il keçirildiyini söyləyib: “Gürcüstanla yanaşı, Xəzər hövzəsinə daxil olan ölkələr də konfransda iştirak edir. Bu gün Gürcüstanın enerji sektorunda fəaliyyət göstərən şirkətlər və digər beynəlxalq qurumlar öz fəaliyyətlərinin nəticələri barədə məlumat veriblər. Biz də gördüyümüz işlər barədə konfrans iştirakçılarını ətraflı məlumatlandırdıq. Bizim şirkət 2008-ci il dekabrın 26-da Gürcüstan hökuməti ilə üç illik müqavilə bağlayıb. 2009-cu ildə 60 minə qədər yeni abunə yaratmışıq. Bu il müqavilənin ikinci ilidir. Şirkətimiz 2010-cu ildə daha 46 min yeni abonentə qaz verməyi nəzərdə tutur və proqram çərçivəsində layihənin sonunadək 150 min abonentə xidmət edəcək”.