Sənaye və energetika

Ana səhifə

Azərbaycan gələn il Rusiyaya təbii qazın ixracını 2 dəfə artıracaq

07 aprel 2010 12:03 (UTC +04:00)

Bakı. Rəşad Süleymanov – APA-Economics. Gələn il 2 mlrd. kubmetr həcmində Azərbaycan qazının Rusiyaya nəqlinə dair tərəflər arasında razılıq əldə olunub. «APA-Economics»in məlumatına görə, buye ARDNŞ prezidenti Rövnəq Abdullayev bildirib.

«Rusiyaya bu il 1 mlrd. kubmetr qazın ötürülməsi barədə razılaşma əldə etmişik və hazırda gündə 3 mln. kubmetr qaz ixrac edirik. Gələn il isə 2 mlrd. kubmetr qaz ixracına dair razılaşmışıq», - deyə R.Abdullayev vurğulayıb.

R.Abdullayev Tükryiə ilə Azərbaycan arasında təbii qazın alqı-satqısına dair ekspertlər səviyyəsində danışıqların davam etdirildiyini və yaxın vaxtlarda rəhbərlik səviyyəsində görüşün keçiriləcəyini vurğulayıb. ARDNŞ prezidenti paralel olaraq Suriyaya Azərbaycan qazının ixracına dair müzakirələrin davam etdirildiyini də bildirib. R.Abdullayevin sözlərinə görə, hazırda Türkiyə və Suriya arasında təbii qazın nəqli üçün infrastruktur hazırlanır. Orada təxminən 50-60 km uzunluğunda qaz kəmərinin çəkilməsi planlaşdırılır.

«Hazırda qarşımızda duran əsas məsələ qaz infrastruktrunun yenidən qurulması proqramının həyata keçirilməsidir. Bu il qaz anbarlarının həcmini 3 mlrd. kubmetrə çatdırmaq üçün işlər aparılır. Bununla əlaqədar həm Qalmaz, həm də Qaradağ anbarlarında kompressorlar təmir olunur, yeni quyular qazılır və kəmərlər yeniləşdirilir», - deyə ARDNŞ prezidenti vurğulayıb.

R.Abdullayev qaz ixracının artırılması üçün Rusiya ilə sərhəddə Şirvanovkada və İranla sərhəddə Astarada yeni kompressor stansiyalarının qurulduğunu və mövcud stansiyanın genişləndirildiyini bildirib. Bununla yanaşı Qazıməmməd aralıq kompressor stansiyasının genişləndirilməsi istiqamətində işlər aparılır. Ümumilikdə, bu işlər sentyabr ayının sonuna qədər tamamlanacaq.