Sənaye və energetika

Ana səhifə

Astara Qaz Kompressor Stansiyasının gücü 5 milyon kubmetrə çatdırılacaq

24 aprel 2010 20:45 (UTC +04:00)

Astara. Ağəddin Babayev – APA. Ölkə başçısı cənab İlham Əliyevin tapşırığına əsasən cənub bölgəsinin qazlaşdırılması prosesinə başlanılıb. APA-nın cənub bürosunun məlumatına görə, bunu aprelin 24-də Azərbaycanın Astara rayonunda yerləşən Qaz Kompressor Stansiyasında olan Azərbaycan Dövlət Neft Şirkətinin (ADNŞ) prezidenti Rövnəq Abdullayev jurnalistlərə müsahibəsində deyib.

Hələ sovet dövründə çəkilmiş Səngəçal - Astara qaz xəttinin indi çox köhnəldiyini və böyük miqdarda qazın nəqlini bu kəmərlə həyata keçirməkdə çətinliklərin yarandığını deyən ARDNŞ prezidenti hazırda xətdə yenidənqurma və bərpa işlərinin aparıldığını qeyd edib: “Bu il 100 km-ə qədər bu boru xəttində bərpa işlərini aparmağı nəzərdə tutmuşuq”.

Astarada kompressor stansiyasının genişləndirilməsi layihəsinin həyata keçirildiyini bildirən R.Abdullayevin sözlərinə görə, ilin sonunadək burada 8 ədəd yeni kompressor maşını quraşdırılacaq.

Artıq işlərin başlandığını söyləyən ARDNŞ-nin rəhbəri boru xəttininin təmirindən sonra cənub bölgəsinin tələbatına uyğun qaz vermək imkanının yaranacağını bildirib: “Bununla bərabər İrana bu kompressor stansiyası vasitəsi ilə qaz nəqlini artıracağıq”.

Hər iki məsələnin ölkə başçısının diqqət mərkəzində olduğunu vurğulayan R.Abdullayev ilin axırına kimi bu problemlərin həlli üçün tədbirlərin görüldüyünü deyib: “Burada olan kompressorlar bizə yalnız Naxçıvana qaz vermək imkanı verir. Əlavə qazın nəqli isə çətindir. Ona görə də burada yeni kompressorlar qurulandan sonra ilin axırına qədər qonşu İrana da böyük həcmdə qaz ötürmək imkanı əldə edəcəyik”.

ARDNŞ prezidenti həmçinin Lənkəran şəhərinin, o cümlədən magistral qaz xətlərinin yaxınlığında yerləşən böyük kəndlərin də bu il tam qazlaşdırılacağını və bu məqsədlə işlərin gündən-günə sürətləndirildiyini diqqətə çatdırıb.

Astara Qaz Kompressor Stansiyasının rəisi Nəsimi Rzayev isə jurnalistlərlə söhbətində bu obyektin 2005-ci ildə istifadəyə verildiyini. və sutkada 2 milyon kubmetr qaz ötürmək gücünə malik olduğunu bildirib. Stansiyanın əsas vəzifəsinin Naxçıvan Muxtar Respublikasını qazla təmin etməkdən ibarət olduğunun vurğulayan N.Rzayevin sözlərinə görə, hazırda bu kompressordan Naxçıvanın gündəlik tələbatından asılı olaraq İran İslam Respublikasına da 1,2 milyon kubmetr qaz ötürülür. Eyni zamanda stansiyanın ərazisində 2 hektar ərazidə yeni 8 kompressor maşın qurulur və gələcəkdə onun gündəlik gücü 5 milyon kubmetrə çatdırılacaq.