Sənaye və energetika

Ana səhifə

Azərbaycan gələn il daha bir yataqda qızıl hasilatına başlayacaq

27 may 2010 08:12 (UTC +04:00)

APA-nın Qərb bürosunun verdiyi məlumata görə, zavodun fəaliyyətinin bir ilinə həsr olunmuş tədbirdə Azərbaycan Beynəlxalaq Mədən Əməliyyatı Şirkətinin (ABMƏŞ) prezidenti Rza Vəziri və Ekologiya və Təbii Sərvətlər Nazirliyi Milli Ekoloji Kəşfiyyat Xidmətinin (MEKX) rəisi Qazi Hacıkərimov iştirak ediblər.

Tədbirdə qeyd olunub ki, zavod fəaliyyət göstərdiyi 1 il ərzində 1 050 kq qızıl istehsal edib. Bundan Azərbaycanın payına düşən 124 kq qızıl xaricdə təmizləndikdən sonra yenidən Azərbaycana gətirilərək Maliyyə Nazirliyinə təhvil verilib və hazırda Mərkəzi Bankda saxlanılır. Bir il müddətində bazara çıxarılan gümüşün miqdarı isə 567 kq olub.

R.Vəziri zavodda mis emalının da həyata keçirildiyini bildirib: «Artıq iki aya yaxındır ki, mis emalına da başlamışıq və konsentrat şəklində mis alınıb. Lakin hələlik mis bazara çıxarılmayıb. Zavodda 600-700 ton mis əldə olunduqdan sonra onu bazara çıxarmaq nəzərdə tutulur».

Gədəbəy yatağında 300 min unsiya qızıl olduğunu deyən şirkət prezidenti bildirib ki, burada qızıl ehtiyatının düşünüləndən daha artıq olduğu gözlənilir: «Bunu deməyə isə orada aparılan yeni araşdırmalar əsas verir. Cari ilin iyul ayında yataqda olan qızılın dəqiq miqdarı məlum olacaq».

Şirkət rəhbəri Tovuz rayonundakı «Qoşa» yatağında da artıq kəşfiyyat işlərinin başa çatmaq üzrə olduğunu, ilin sonuna kimi əldə olunan məlumatların Azərbaycan hökümətinə təqdim ediləcəyini bildirib. «Qoşa» yatağında istismar işlərinə 2011-ci ildən başlamaq planlaşdırılır.

Qeyd edək ki, ABMƏŞ Hasilatın Pay Bölgüsü Sazişində iştirak edir. Mineral ehtiyatların istismarına dair bağlanmış bu 30 illik müqavilədə Azərbaycan hökumətinin iştirak payı 51%, Böyük Britaniyanın «Anglo Asian Mining Plc.» şirkətinin payı isə 49% təşkil edir. Şirkətə müqavilə əsasında 6 sahə verilib. Bu sahələrdən 1-i Naxçıvan MR-da, 1-i Tovuzda, 1-i Gədəbəydə, 3-ü isə işğal altında olan ərazilərdədir (Kəlbəcərdəki «Söyüdlü» (Zod), Ağdərədəki «Qızılbulaq» və Zəngilandakı «Vəcnəli» yataqları). Sazişin göstəricilərinə görə, bu yataqlardan təxminən 400 ton qızıl, 2500 ton gümüş və 1,5 mln. ton mis hasil etmək nəzərdə tutulub.