Sənaye və energetika

Ana səhifə

Azərbaycan daha bir dövlət müəssisəsini satışa çıxarıb

31 may 2010 08:06 (UTC +04:00)

Bakı. Rəşad Süleymanov – APA-Economics. Azərbaycan Əmlak Məsələləri Dövlət Komitəsi (ƏMDK) «Mingəçevir Şüşə Lifi» ASC-nin səhmlərinin 97,78%-nin satışı üzrə investisiya müsabiqəsi elan edib. Bu barədə «APA-Economics»ə ƏMDK-nin mətbuat xidmətindən məlumat verilib.

Müvafiq qanunvericiliyə uyğun olaraq, səhmdar cəmiyyətinin özəlləşdirilməsi ilə bağlı elan edilən investisiya müsabiqəsində Azərbaycanın hüquqi və fiziki şəxsləri ilə yanaşı, xarici investorlar da iştirak edə bilərlər.

Səhmdar cəmiyyətinin əsas fəaliyyətini şüşə lifi, elektroizolyasiya şüşə parça və şüşə lentlərinin istehsalı və satışı təşkil edir. Mingəçevir şəhərində yerləşən səhmdar cəmiyyəti 1965-ci ildə fəaliyyətə başlayıb. Səhmdar cəmiyyətinin investisiya müsabiqəsinə çıxarılmış səhmlərinin sayı 241 888 ədəd təşkil edir. Bu səhmlərin ümumi nominal dəyəri isə 483 776 manatdır.

Müsabiqədə iştirak etmək üçün investorlar yüksək keyfiyyətli şüşə lifi və digər kimya sənayesi məhsullarının istehsalına nail olmaq məqsədilə müəssisənin mövcud fəaliyyətinin beynəlxalq və müasir tələblər səviyyəsində yenidən qurulması və təkmilləşdirilməsinə dair bir sıra şərtləri özündə cəmləşdirən, investisiya qoyuluşlarının istiqamətləri, məbləği və müddətləri göstərilməklə İnvestisiya Proqramını təqdim etməlidirlər. Təqdim olunacaq İnvestisiya Proqramında beynəlxalq tələblərə cavab verən qabaqcıl texnologiyaların və avadanlıqların alınması və quraşdırılması, habelə istehsal ediləcək məhsulların keyfiyyətinin qaldırılması və çeşidinin artırılmasına dair təkliflər göstərilməlidir.

İddiaçılar, dövlət büdcəsinə ödəniləcək 280 min manat vəsaitdən və komitəyə təqdim olunacaq 12 min ədəd dövlət özəlləşdirmə çekindən az olmamaq şərti ilə müvafiq təkliflər verməli, xarici investorlar isə təklif edəcəkləri dövlət özəlləşdirmə çeklərinin sayına müvafiq dövlət özəlləşdirmə opsionları da təqdim etməlidirlər.

Müsabiqədə iştirak etmək üçün ərizə və təkliflərin qəbulu iyunun 30-dək aparılacaq, müsabiqə komissiyası tərəfindən təkliflərin qiymətləndirilməsi isə iyulun 2-dən başlayaraq həyata keçiriləcək.