Sənaye və energetika

Ana səhifə

Son 15 ildə Azərbaycan iqtisadiyyatına 82 mlrd. dollar sərmayə yatırılıb

01 iyun 2010 09:14 (UTC +04:00)

Dövlət başçısı 1994-cü ildən Azərbaycanda keçirilən neft-qaz sərgisinin əhəmiyyətindən danışarkən qeyd edib ki, sərginin ilk dəfə ölkədə keçirilməsi Azərbaycanın neft strategiyasının başlanması ilinə təsadüf edib. Belə ki, məhz 1994-cü ildə Azərbaycan «Əsrin Müqaviləsi»nə imza atıb və indiyədək neft hasilatının artırılmasına, yeni kəmərlərin tikintisinə və hasil edilən neftin nəqlinə, bu sahədə ciddi inkişafa nail olub və 16 ildir ki, xarici şirkətlərlə qarşılıqlı əməkdaşlıq edir.

Azərbacanın qaz sahəsindən danışan İ.Əliyev onu da bildirib ki, 1996-cı ildə Azərbaycanda «Şahdəniz» layihəsinin icrasına başlanılıb və həmin ildən etibarən ölkənin qaz sektoru inkişafa doğru gedir.

Ölkənin karbohidrogen potensialından danışan prezident qeyd edib ki, Azərbaycanın neft-qaz siyasəti açıq və səmimidir və ölkə üzərinə götürdüyü bütün öhdəlikləri tam yerinə yetirir: «Bu il Azərbaycanda 52 mln. ton neft, 30 mlrd. kubmetr qaz hasil olunacağı gözlənilir ki, bu da daxili tələbatdan 3 dəfə çoxdur. Eyni zamanda, biz yeni bazarlara çıxacağıq ki, neft-qaz potensialımızdan maksimum yararlanaq».

İ.Əliyev əlavə edib ki, hazırda Azərbaycanın 3 neft və 4 qaz kəməri mövcuddur, bu da ölkənin enerji daşyıcılarının ixracının deversifikasiyasını tam təmin edir.

Ümumiyyətlə, Azərbaycanın iqtisadi inkişafından danışan prezident bildirib ki, qlobal maliyyə böhranı və bunun nəticəsində neftin qiymətinin aşağı düşməsinə baxmayaraq, Azərbaycan iqtisadiyyatı 2009-cu ildə də inkişaf edib: «Ötən il Azərbaycan iqtisadiyyatının artımı 9%-dən artıq olub və maliyyə böhranına baxmayaraq, ölkədə bütün sosial proqramlar və infrastruktur layihələri uğurla icra olunub. Bu il də Azərbaycanda iqtisadi artım davam edir».

Ölkə iqtisadiyyatına yatırılan investisiyalardan danışan İ.Əliyev onu da qeyd edib ki, 1995-ci ildən Azərbaycan iqtisadiyyatına ümumilikdə 82 mlrd. ABŞ dolları həcmində sərmayə yatırılıb, bunun da yarısı qeyri-neft sektorunun inkişafına yönəldilib.

Sonda öz çıxışında İ.Əliyev bildirib ki, bu il Azərbaycan Çıraq Neft Laiyhəsinə start verib və yaxın gələcəkdə «Şahdəniz-2» layihəsinə başlayacaq: «Bu layihəyə 20 mlrd. dollar vəsait qoyulacaq ki, sonradan bu layihədən ölkənin qeyri-neft sektoruna eyni həcmdə vəsait yatırılacaq».

Xatırladaq ki, «Iteca Caspian» şirkətinin təşkilatçılığı ilə keçirilən beynəlxalq neft-qaz sərgisi iyunun 4-dək davam edəcək. Sərgi ilə paralel iyunun 2-3də Bakıda eyni adlı konfrans da keçiriləcək. APA İnformasiya Agentliyi sərgidə «Baş onlayn dəstək» statusu ilə iştirak edir.