Sənaye və energetika

Ana səhifə

«AzBTC Co.»-nun icraçı direktoru İlham Nəsirov: «Qazaxıstan tezliklə Bakı-Ceyhan kəmərilə neftin nəqlini bərpa edəcək»

01 iyun 2010 10:12 (UTC +04:00)

«APA-Economics»in məlumatına görə, bunu «AzBTC Co.» şirkətinin icraçı direktoru İlham Nəsirov bildirib.

İNəsirov bildirib Ki, artıq tezliklə Qazaxıstan «Tengiz» yatağından hasil etdiyi neftin Bakı-Ceyhan kəmərilə nəqlini bərpa edəcək. Bu, tərəflər arasında neftin nəqli həcmi və nəqletmə tarifləri ilə bağlı aparılan danışıqlardan sonra mümkün olacaq. «Məsələ tezliklə həll olunacaq. Adətən, hər hansı şirkətlə bir illik müqavilə bağlanır. Müqavilənin müddəti bitdikdən sonra tarif yenidən baxılır», - deyə «AzBTC Co.»-nun icraçı direktoru vurğulayıb.

Xatırladaq ki, bu ilin əvvəlində Qazaxıstanın «Tengiz» yatağında hasilat işləri aparan «Tengizşevroyl» əməliyyat şirkəti BTC kəmərilə neftin nəqlini dayandırıb və bunu nəqletmə tariflərinin artırılması ilə əlaqələndirib.

Hazırda BTC ilə neftin nəqli üzrə iki tarif tətbiq olunur. Bunlardan biri BTC iştirakçıları, digəri isə layihədə iştirak etməyib, ancaq kəmərlə neft ixrac edən digər şirkətlər üçün müəyyənləşdirilmiş tariflərdir. Hazırda BTC-də iştirak edən şirkətlər eyni zamanda Qazaxıstanda neft hasilatı ilə məşğuldur. BTC-də iştirak etməyən şirkətlər üçün müəyyənləşdirilən tarif daim korrektə olunur.

Qeyd edək ki, Bakını Türkiyənin Ceyhan limanı ilə birləşdirən BTC kəmərinin uzunluğu 1 769 km təşkil edir. Kəmərə ilk neft 2005-ci il may ayının 25-də vurulub və ilk neft Ceyhan limanına 2006-cı il may ayının 28-də çatıb.

Ötən il Azərbaycanda magistral neft kəmərləri ilə 50,5 mln. ton neft nəql edilib ki, 2008-ci illə müqayisədə nəqletmənin həcmi 13,7% artıb. Dövlət Statistika Komitəsindən verilən məlumata görə, nəqletmənin ¾ hissəsi ölkənin əsas nəqliyyat infrastrukturlarından olan Bakı-Tiflis-Ceyhan neft ixrac kəməri ilə həyata keçirilib və ötən il əzində bu kəmər vasitəsilə 38,2 mln. ton neft ötürülüb. İl ərzində BTC kəməri ilə Azərbaycan nefti ilə yanaşı, 1,9 mln. ton Qazaxıstan nefti də nəql edilib.

Qeyd edək ki, BTC-nin səhmdarları sırasına «BP-Azerbaijan» (30,1%), AzBTC (25%), «Chevron» (8,9%), «Statoil» (8,71%), TPAO (6,53%), ENİ (5%), «Total» (5%), «Itochu» (3,4%), «Inpex» (2,5%), «ConocoPhillips» (2,5%) və «Hess» (2,36%) şirkətləri daxildir.