Sənaye və energetika

Ana səhifə

Azərbaycanın Türkiyəyə satdığı təbii qazın qiyməti xüsusi düsturla hesablanacaq

01 iyun 2010 11:25 (UTC +04:00)

«APA-Economics»in məlumatına görə, bunu Azərbaycan Dövlət Neft Şirkətinin (ARDNŞ) prezidenti Rövnəq Abdullayev bildirib.

«Biz çalışacağıq ki, iyunun 7-dək kontraktları hazırlayıb başa çatdıraq. Bununla bağlı hazırlıq prosesi gedir və sənədlər tərtib olunur. Qazın həcmi, qiyməti və s. məsələlər razılaşdırılıb», - deyə R.Abdullayev vurğulayıb.

Qazın qiymət və həcmi barədə konkret rəqəmləri açıqlamayan ARDNŞ prezidenti qiymətin xüsusi düstur əsasında müəyyənləşdiriləcəyini vurğulayıb. Həcmə gəldikdə isə, R.Abdullayev «Türkiyəyə lazım olan həcmdə qaz verəcəyik», - deyə bildirib.

ARDNŞ prezidenti onu da əlavə edib ki, Türkiyə ərazisindən qazın tranzit qiymətini biləndən sonra digər ölkələrə də Azərbaycanın qazının nəqli məsələlərinə baxılacaq.

«Biz qaz təchizatçısı kimi bir layihədə qalmaq istəmirik. Bütün layihələrə eyni dərəcədə yanaşırıq», - deyə ARDNŞ prezidenti vurğulayıb.

Qeyd edək ki, Azərbaycan 2008-ci ilin aprel ayınadək Türkiyəyə təbii qazın 1000 kubmetrini 120 ABŞ dolları qiyməti ilə satıb. Türkiyə tərəfi həmin tarixdən sonra alınan qazın qiymətindəki fərqin də ödəniləcəyini açıqlayıb.