Sənaye və energetika

Ana səhifə

Azərbaycan 2017-ci ilədək «Euro-6» və «Euro-7» standartlarının tətbiqinə başlayacaq

01 iyun 2010 13:10 (UTC +04:00)

Bu, ilk mərhələdə idxal edilən avtomobillərə şamil olunacaq. «APA-Economics»in məlumatına görə, bunu Azərbaycan Standartlaşdırma, Metrologiya və Patent üzrə Dövlət Komitəsinin (SMPDK) sədri Ramiz Həsənov bildirib.

R.Həsənovun sözlərinə görə, bu standartlara keçidin birdən-birə həyata keçirilməsi ümumiyyətlə mümkün deyil: «Birinci idxaldan başlamalı və hansı avtomobillər ki, standartlara cavab vermir, onların qarşısını almalıyıq. İkinci mərhələdə isə artıq Azərbaycanda mövcud olan avtomobillərlə bağlı müvafiq tədbirlər görülməlidir».

SMPDK rəhbəri bu standartlar tətbiq olunandan sonra Rusiyadan Azərbaycana avtomobil idxalının dayanacağı barədə yayılan məlumatları təkzib edib. R.Həsənovun sözlərinə görə, artıq Rusiyada «Euro-3» standartlarına cavab verən avtomobillər istehsal olunur. Bu qaydalar Rusiyadan idxal edilən injektorlu avtomobillərə şamil olunmayacaq.

Komitə sədri bildirib ki, iyulun 1-dən «Euro-2» tətbiq olunacaq, iki ildən sonra isə «Euro-3» standartının tətbiqi planlaşdırılır. Komitə sədri deyib ki, köhnə, standartlara cavab verməyən avtomobilləri «Euro-2» standartlarına keçirmək üçün müəyyən katalizator qurğularının qoyulması da mümkündür.

Komitə sədri köhnə, standartlara cavab verməyən avtomobillərin dövriyyədən tədricən çıxarılacağını qeyd edib: «Bizim təklif ondan ibarətdir ki, köhnə avtomobilləri dövriyyədən birdən-birə çıxarmayaq. Belə avtomobillər üçün müəyyən vergi qoyulsun. Əgər vətəndaşa vergini vermək sərf edərsə, avtomobilini istismar edəcək, etməyəcəksə, niyə belə bir avtomobili saxlamalıdır?»

R.Həsənov bəzi ölkələrdə köhnə avtomobillərin dövlət tərəfindən vətəndaşlardan satın alınması təcrübəsinin olduğunu da xatırladıb. Amma bunu özündə avtomobil istehsal edən dövlətlərin tətbiq etdiyinə diqqət çəkən komitə sədri Azərbaycanda bu məsələnin hələlik müzakirə olunmadığını vurğulayıb.

ARDNŞ prezidenti Rövnəq Abdullayev isə artıq Azərbaycanda «Euro-2» standartlarına cavab verən avtomobil benzini istehsal olunduğunu qeyd edib: «İstehsal etdiyimiz benzinin keyfiyyəti «Euro-2»dən yüksəkdir. «Euro-3»lə bağlı müəyyən çatışmazlıqlar var. Çalışırıq ki, 2011-ci ilin sonlarına «Euro-3» standartlarına keçək».

Ümumiyyətlə ARDNŞ-in «Euro-4» standartlarına belə keçə bilməsinin mümkün olduğunu deyən şirkət rəhbəri öncə bunun üçün yeni qurğuların tikilməli olduğunu deyib. Lakin neft emalı zavodunda boş sahələrin az olması, zavodun şəhərdə yerləşməsi buna imkan vermir. Şirkət rəhbəri onu da vurğulayıb ki, neft emalı kompleksi tikiləndən sonra, ARDNŞ yaxın 6-7 ilə «Euro-5» və «Euro-6» standartlarına cavab verən benzin istehsal edəcək.