Sənaye və energetika

Ana səhifə

“OMV” şirkətinin regional meneceri: “Hətta qazın tranziti ilə bağlı Türkiyə ilə saziş olmadan, Azərbaycan “Nabucco” üçün qaz göndərə bilər” - MÜSAHİBƏ

“OMV” şirkətinin regional meneceri: “Hətta qazın tranziti ilə bağlı Türkiyə ilə saziş olmadan, Azərbaycan “Nabucco” üçün qaz göndərə bilər” - <font color=red>MÜSAHİBƏ</font>

01 iyun 2010 13:20 (UTC +04:00)

- Sizin şirkət “Nabucco” layihəsinin reallaşdırılması üzrə konsorsiuma daxildir. Hazırda layihə ilə bağlı Azərbaycanla danışıqlar aparılırmı və hansısa nəticələr varmı?

- Bir neçə şirkət ARDNŞ ilə danışıqlar aparır. “OMV” şirkəti “Nabucco” konsorsiumunun lideridir və “Nabucco” kəməri ilə nəql olunacaq qazla bağlı danışıqlarda aktiv iştirak edir.

- “Nabucco” layihəsi üçün qaz tədarükünə dair Azərbaycanla razılaşma əldə etmək planlaşdırılırmı?

- Bu, təkcə bizdən asılı məsələ olmadığı üçün konkret tarix göstərə bilmərik. Biz ARDNŞ və “Şahdəniz” konsorsiumu ilə danışıqlar aparırıq. Danışıqlarda irəliləyiş əldə etmək də təkcə bizdən yox, bizim əməkdaşlığımızdan asılıdır. İnanırıq ki, Azərbaycanla Türkiyə arasında qazın tranziti üzrə razılaşmanın imzalanması Azərbaycanın qaz ixrac etməsi və “Nabucco”nun reallaşması imkanları üçün irəliyə atılmış addım olacaq.

- Əgər saziş imzalanmasa, onda necə - bu, “Nabucco”nun reallaşmasına necə təsir edəcək? Belə olan halda layihənin həyata keçirilməsi mümkündürmü?

- “Nabucco”ya dair hökumətlərarası saziş mövcuddur ki, bu da Türkiyə vasitəsilə tranziti tənzimləyir. Ötən ilin iyulunda Türkiyədə imzalanmış bu saziş sabit siyasi çərçivədir. Bu isə o deməkdir ki, Azərbaycan hətta Türkiyə ilə ikitərəfli saziş olmadan belə Türkiyə ərazisi vasitəsilə “Nabucco” üçün qazın tranzit nəqlini həyata keçirə bilər. Bununla belə, Azərbaycanın Türkiyə ilə ikitərəfli razılaşması “Nabucco” layihəsinin reallaşmasına pozitiv təsir edə bilər.

- Hazırda layihənin reallaşmasının çərçivələri necədir?

- “Nabucco”nun reallaşmasının çərçivələri 2014-cü ilin ikinci yarısıdır. Bir məqamı vurğulamaq istərdim ki, “Nabucco” qaz nəqli üçün bir yox, bir neçə mənbədən istiqamətlənmiş layihədir. Azərbaycan burada ən vacib istiqamətlərdəndir və ümid edirik ki, layihədə iştirak edəcək.

- “Nabucco” üçün Türkmənistan və İraqdan qazın nəqli razılaşdırılıbmı? İran layihəyə cəlb olunacaqmı?

- Biz Türkmənistanla danışıqlar aparırıq və güman edirik ki, bu ölkə “Nabucco” layihəsi üzrə Avropa İttifaqı üçün qaz nəql etməyə hazırdır. “OMV” şirkəti Şimali İraqda yataqların işlənməsində çox aktiv iştirak edir və düşünürük ki, İraq da “Nabucco”nun əhəmiyyətli təchizatçılarından ola bilər. İrana gəlincə, bu ölkə hazırda siyasi səbəblər üzündən etibarlı mənbə sayılmır. İranın qaz yataqları var, biz vəziyyəti öyrənməkdə davam edəcəyik, amma hazırkı şəraitdə İrana etibarlı təchizatçı kimi baxılmır.