Sənaye və energetika

Ana səhifə

Yunanıstanın Ətraf Mühit, Energetika və İqlim Dəyişiklikləri Nazirliyinin baş katibi: Türkiyə-Yunanıstan-İtaliya layihəsi digər layihələrə nisbətən daha təkmildir

03 iyun 2010 13:33 (UTC +04:00)

- Azərbaycan və Yunanıstan arasında energetika sahəsində ikitərəfli əməkdaşlığın hazırkı səviyyəsini necə qiymətləndirirsiz?

- Ölkələrimiz arasında çox yaxşı münasibətlər mövcuddur. Amma energetika sahəsində əlaqələrimizi daha da dərinləşdirmək istərdik. Yaxın vaxtlarda Azərbaycanın sənaye və energetika naziri Yunanıstana səfər etməyi planlaşdırır. Biz hazırda energetika, qaz və bərpa olunan enerji mənbələri sahəsində sıx əməkdaşlıq qurulması mərhələsindəyik. Bərpa olunan enerji mənbələri sektoru hələlik kiçik olsa da, gələcəkdə onun genişlənməsi üçün yaxşı imkanlar mövcuddur.

- Yunanıstanın DEPA şirkəti ARDNŞ ilə danışıqlar aparır. Hazırda müzakirələr hansı mərhələdədir?

- Hazırda Azərbaycan və Yunanıstan şirkətləri TGI (Türkiyə-Yunanıstan-İtaliya) layihəsi üzrə danışıqlara cəlb olunub. Bu, bizim kontaktların bir hissəsidir. Biz qarşılıqlı anlaşma haqqında memorandum imzalamağı planlaşdırırıq ki, bu da sözügedən layihənin reallaşdırılmasını sadələşdirəcək. Biz ARDNŞ-in layihədə iştirakında maraqlıyıq. Digər tərəfdən, Yunanıstanın Azərbaycan qazını birbaşa alması üçün danışıqlar aparırıq. Bu, yəqin ki, gələcəkdə mümkün olacaq.

- Yunanıstan Azərbaycandan hansı həcmdə qaz almaq istəyir?

- Hazırkı həcmi 1 mlrd. kubmetr həcmində müəyyənləşdirmişik. Amma gələcəkdə Bolqarıstana qaz nəql edəcək IGB (Yunanıstan-Bolqarıstan) layihəsi çərçivəsində bu həcmi artırmaq istəyirik.

- TGI layihəsi çərçivəsində qarşılıqlı anlaşma haqqında memorandumun nə vaxt imzalanması planlaşdırılır? TGI layihəsinin gələcəyini necə görürsüz?

- Bu memorandumun şirkətlər arasında imzalanması nəzərdə tutulur. Layihənin reallaşması yolunda sonuncu əhəmiyyətli addım Yunanıstan və Türkiyə hökumətləri arasında qarşılıqlı anlaşma memorandumunun imzalanması olub. Bu layihə hər iki ölkənin hökumətləri tərəfindən çox vacib və prioritet layihə adlandırıldı. Bu, layihənin gələcək inkişafına təkan verə bilər. Azərbaycan hökumətinin də layihəyə marağını ifadə etməsi mümkündür. TGI layihəsinin sürətlə inkişaf edəcəyini düşünürük.

- Demək istəyirsiz ki, TGI layihəsi “Nabucco”, “Cənub dəhlizi” kimi enerji layihələrinə nisbətən daha tez reallaşdırılmaq şanslarına malikdir?

- Düşünürük ki, hazırkı mərhələdə bu layihə digər enerji layihələrinə nisbətən daha təkmildir və gözləyirik ki, layihənin bütün iştirakçıları üçün cəlbedici olacaq.

- “Nabucco” layihəsi reallaşmanın müddətini açıqlayıb – 2014-cü ilin ikinci yarısı. TGI layihəsi üçün belə çərçivələr varmı?

- Düşünürük ki, TGI layihəsi daha tez reallaşdırıla bilər, amma konkret vaxt çərçivəsi qoymuruq.

- Azərbaycanla Türkiyə arasında qazın qiyməti ilə bağlı aparılan danışıqlar TGI layihəsinin reallaşmasına necə təsir edə bilər?

- Hesab edirik ki, Azərbaycanla Türkiyə arasında aparılan danışıqlar çox vacibdir. Razılaşmanın imzalanması şərtləri asanlaşdıracaq, qaz Türkiyəyə gedəcək, bu isə TGI layihəsinin reallaşmasına müsbət təsir edəcək.