Sənaye və energetika

Ana səhifə

Azərbaycanda yaradılacaq müdafiə təyinatlı məmulatların seriyalı istehsalına dair 42 mln. manatlıq müqavilələr imzalanacaq

14 iyul 2010 09:28 (UTC +04:00)

Bakı. Nicat Mustafayev - APA-Economics. Bu ilin sonunadək Azərbaycanda yaradılacaq müdafiə təyinatlı məmulatların seriyalı istehsalını təmin etməklə əlavə olaraq 42 mln. manat məbləğində müqavilələrin bağlanması gözlənilir.

«APA-Economics»in məlumatına görə, bunu Azərbaycan Prezidenti İlham Əliyevin sədrliyi ilə keçirilən Nazirlər Kabinetinin 2010-cu ilin birinci yarısının sosial-iqtisadi inkişafının yekunlarına həsr olunmuş iclasında ölkənin müdafiə sənayesi naziri Yavər Camalov bildirib.

Nazirin sözlərinə görə, 2010-cu ilin ilk altı ayında müdafiə təyinatlı məmulatlara dair bağlanmış müqavilələrin həcmi 61,1 miln. manat təşkil edib və ilin sonunadək əlavə olaraq daha 42 mln. manat məbləğində müqavilələrin bağlanması planlaşdırılır: «Bununla da müdafiə təyinatlı məmulatların 2010-cu il üçün istehsal həcmi 103 mln. manata çatdırılacaq. Bu il üçün bağlanmış müqavilələrin həcmi 2006-cı illə müqayisədə 120 dəfə, 2007-ci illə müqayisədə 9,6 dəfə, 2008-ci illə müqayisədə 6 dəfə artıb».

Y.Camalov onu da qeyd edib ki, bu il proqrama uyğun olaraq 98 mövzu üzrə 108 məmulatın yaradılması nəzərdə tutulub ki, bu da 241 mərhələni əhatə edəcək: «Hesabat dövründə həmin mərhələlərdən 15-i yerinə yetirilib və 19-u başa çatmaq üzrədir. Digərləri üzərində işlər davam etdirilir. Eyni zamanda mövzular üzrə taktiki-texniki tapşırıqlar işlənilir, atıcı və artilleriya silahlarının, döyüş sursatlarının, optik cihazların sınaqlarının keçirilməsi üçün hazırlıq işləri aparılır».

Nazir həmçinin qeyd edib ki, 2010-cu ildə 413 adda müdafiə təyinatlı məmulatların və onların ehtiyat hissələrinin istehsalı nəzərdə tutulub ki, bu da 2009-cu ildə istehsal olunan məmulatların sayından 1,2 dəfə çoxdur: «Hazırda bağlanmış müqavilələrin tam həcmdə yerinə yetirilməsi istiqamətində məqsədyönlü tədbirlər həyata keçirilir. Bu ildə əsasən müxtəlif tipli minaatanların, qumbaraatanların, snayper tüfənginin, optik nişangahların, kollimatorların, minaların, atəş yığımlarının, aviasiya bombalarının, müxtəlif növ atıcı silahlar üçün trenajorların, tank və piyadaların döyüş maşınları üçün tırtıl dəstlərinin, müxtəlif növ patronların, əl qumbaralarının və s. məmulatların seriyalı istehsalı nəzərdə tutulub».

Y.Camalov onu da bildirib ki, hazırda Müdafiə Sənayesi Nazirliyi 60-dan çox ölkə ilə əməkdaşlıq edir və məhz bu əməkdaşlıq nəticəsində qısa müddət ərzində nazirliyin müəssisələrində müasir tələblərə cavab verən müdafiə təyinatlı məmulatların seriyalı istehsalı həyata keçirilir: «Yaradılmış yeni istehsal sahələri, quraşdırılmış texnologiya və avadanlıqlar hesabına istehsal olunan müdafiə təyinatlı məmulatların çeşidlərinin sayı 413-ə çatdırılıb. İstehsal həcmi ümumilikdə 2006-cı illə müqayisədə 2009-cu ildə 2,8 dəfə, müdafiə təyinatlı məmulatların istehsalı isə 46 dəfə artırılıb».