Sənaye və energetika

Ana səhifə

«BP-Azerbaijan» şirkəti Goranboy rayonunda istixana təsərrüfatı yaratmaq məqsədilə yeni layihəyə başlayıb

15 iyul 2010 08:58 (UTC +04:00)

Bakı. Nicat Mustafayev - APA-Economics. «BP-Azerbaijan» şirkəti və onun Azəri-Çıraq-Günəşli (AÇG), Bakı-Tiflis-Ceyhan (BTC), «Şahdəniz» və Cənubi Qafqaz Boru Kəməri (CQBK) layihələrindəki tərəfdaşları Goranboy rayonunda istixana təsərrüfatı yaratmaq məqsədi ilə yeni bir icma layihəsinə başlayıb.

«BP-Azerbaijan» şirkətindən «APA-Economics»ə verilən məlumata görə, layihənin əsas məqsədi BTC və CQBK boyunca yaşayan icmaların davamlı iqtisadi inkişaf imkanlarına kömək etməkdir. Bu layihə boru kəmərləri boyunca yerləşən dörd kəndi və bir qəsəbəni əhatə edəcək ki, bura Nadirkənd, Cinli Borsunlu, Əzizbəyov, Yolpaq və Qazanbulaq icmaları daxildir.

Bu layihənin həyata keçirilməsi həmin icmalara tərəvəz toxumlarının təchizatı, 27 istixana və müvafiq avadanlıqların təmin olunması da daxildir. Layihə həmçinin bu təsərrüfatı idarə etmək üçün icma üzvlərinə lazım olan bacarıq və bilikləri də təmin edəcək. Bu məqsədlə istixana tikintisi, istixananın təşkili, bitkilərin becərilməsi, gündəlik işləri idarə etmək və biznes planı işləyib hazırlamaq kimi sahələr üzrə təlimlər keçiriləcək. Təlim kursları həmçinin istixanada yetişdirilmək üçün ən münasib bitki növləri, ziyanvericilərə və xəstəliklərə qarşı mübarizə və torpağın gübrələnməsi kimi sahələri də əhatə edəcək.

Layihənin icrasından yeni yaradılmış təsərrüfat və məhsuldarlığın artması vasitəsilə icmaların gəlir imkanlarının yaxşılaşdırılması, istixana təsərrüfatını idarə etmək bacarıqları, bilik və imkanlarının artırılması, bazar imkanlarının genişləndirilməsi, fermerlərin biznesi idarəetmə bacarıqlarının və texniki bacarıqlarının artırılması kimi nəticələrin əldə olunması gözlənilir.

Layihənin ümumi dəyəri 196 min ABŞ dolları təşkil edir ki, bunun 171 min dolları «BP-Azerbaijan» və onun tərəfdaşları tərəfindən ayrılacaq. Yerdə qalan təxminən 25 min dollar məbləği isə icmalar ödəyəcək. Layihə 2011-ci ilin noyabr ayınadək davam edəcək.

Qeyd edək ki, sözügedən layihə 1996-cı ildə təsis edilmiş yerli qeyri-hökumət təşkilatı Gəncə Aqrobiznes Assosiasiyası (GABA) tərəfindən həyata keçirilir. Bu qeyri-hökumət təşkilatı «BP-Azerbaijan» və tərəfdaşlarının BTC və CQBK boru kəmərləri boyunca Davamlı İnkişaf Təşəbbüsü çərçivəsində keçirililmiş müsabiqə əsasında seçilib.