Sənaye və energetika

Ana səhifə

«Azərikimya»nın müəssisələrində texniki və ekoloji təhlükəsizliyə ciddi diqqət yetirilir

15 iyul 2010 15:46 (UTC +04:00)

Bakı. Aynur Vəliyeva - APA-Economics. ARDNŞ-nin «Azərikimya» İstehsalat Birliyinin müəssisələrində texnoloji qurğu və avadanlıqların əsaslı təmirindən sonra onların təhlükəsiz istismarını, ahəngdar işini, yüksək məhsuldarlığını, təhlükəsizlik texnikası və yanğın təhlükəsizliyini təmin etmək məqsədilə tədbirlər görülür.

«Azərikimya»dan “APA-Economics”ə verilən məlumata görə, müəssisələrdə texniki-təhlükəsizlik tədbirlərini gücləndirmək məqsədilə birlik rəhbərliyinin sərəncamı ilə hər bir istehsalata və sexə ayrı-ayrılıqda cavabdeh olan mühəndis və texniki işçi ayrılıb. Təmirə cəlb olunan 60-dan artıq briqadanın bütün işçiləri təhlükəsizlik texnikası qaydaları üzrə təlimatlandırılıb, təmir işlərinə yalnız tam hazır olduqdan və bütün təhlükəsizlik tədbirləri yerinə yetirildikdən sonra başlanılıb.

ARDNŞ-in strukturuna daxil edildikdən sonra birliyin əməkdaşları qısa müddət ərzində 1000-dən artıq qoruyucu dəbilqə, 2300 dəst fəhlə geyimi, 1000 cüt ayaqqabı, həmçinin qaynaqçılar üçün xüsusi geyim dəstləri və rezin çəkmələrlə təmin ediliblər. Yüksəklikdə işləyən fəhlələr qoruyucu kəmər və digər mühafizə vasitələri ilə təmin olunub, onların hər biri tibbi və psixoloji müayinədən keçirilib.

Bununla yanaşı, Etilen-polietilen zavodunda köhnə avadanlıqlar yeniləri ilə əvəz olunur, xüsusi təhlükəsizliyi təmin etmək üçün boru xətlərinin, arakəsmələrin təcrid olunmasına başlanılıb, aşınmaya uğramış xidmət meydançaları və pilləkənlər təmir edilib.

Gələcəkdə atmosferə və dövri su sisteminə karbohidrogen qazlarının və zərərli maddələrin düşməsinin qarşısını almaq məqsədi ilə 15 ədəd istilikdəyişdiricisinin yeniləri ilə əvəz olunması, digərlərinin isə əsaslı təmiri nəzərdə tutulub.

Sənaye zonasının və ümumilikdə Sumqayıt şəhərinin ekoloji durumunu yaxşılaşdırmaq üçün zavodda yerləşən 120 m hündürlüyündə olan məşəl qurğusunun əsaslı təmirindən və başlığının dəyişdirilməsindən sonra tullantı qazların tüstüsüz yanması təmin ediləcək.