Sənaye və energetika

Ana səhifə

Azərbaycanda IPI indeksi kəskin azalıb

26 iyul 2010 12:18 (UTC +04:00)

Bakı. Vahab Rzayev – APA-Economics. Azərbaycanda Sənaye istehsalı indeksi (Industrial production index – IPI) 2010-cu ilin iyun ayında 79,4% təşkil edib. “APA-Economics”in Dövlət Statistika Komitəsinin məlumatları əsasında apardığı hesablamaya əsasən, bu indeks cari ilin mayında 103,3%, aprelində 100,8%, martında 113%, fevralında 85%, yanvarında isə 106% olub.

Industrial production index hesabat ayında istehsal olunmuş sənaye məhsul və xidmətlərin pul ifadəsində həcminin əvvəlki ayın eyni göstəricisinə olan və faizlə ifadə olunan nisbətdir. Belə ki, indeks iyun ayında istehsal edilmiş məhsulun dəyəri (2,018 mlrd. manat) aprel ayında istehsal edilmiş məhsulun dəyərinə (2,541 mlrd. manat) bölünməklə hesablanıb.

İndeksin dinamikasına gəldikdə, fevralda indeksin kəskin azalması baş verib, mart ayında sənaye istehsalında yenidən canlanma, apreldə müəyyən dərəcədə zəifləşmə müşahidə olunub. May ayında isə sənaye istehsalın indeksi yenidən artmağa başlayıb, lakin iyunda onun kəskin azalması baş verib ki, bu da sənaye istehsalın azalmasını əks etdirir. İyunda baş vermiş azalma ümumi sənaye istehsalın artım tempin zəifləməsinə də təsir göstərib. Belə ki, yanvar-may ayları ərzində artım tempi 4,3% təşkil etdiyi halda, yanvar-iyunda 3,5%-ə enib.

Dövlət Statistika Komitəsinin məlumatına görə, 2010-cu ilin yanvar-iyunda ölkə üzrə sənaye istehsalı 14 158,9 mln. manat təşkil edib.