Sənaye və energetika

Ana səhifə

Azərbaycanda sənaye mal ehtiyatları indeksinin azalması davam edir

27 iyul 2010 13:09 (UTC +04:00)

Bakı. Vahab Rzayev – APA-Economics. Azərbaycanda sənaye istehsalında mal ehtiyatları indeksi 2010-cu ilin iyul ayının 1-nə mənfi 5,9% təşkil edib. «APA-Economics»in Dövlət Statistika Komitəsinin məlumatları əsasında apardığı hesablamalara görə, bu indeks iyunun 1-nə mənfi 5,3%-ə, mayın 1-nə isə müsbət 19,8%-ə bərabər olub.

Mal ehtiyatları indeksi sənaye müəssisələrinin anbarlarında qalan hazır məhsul ehtiyatları üzrə ay ərzində yaranmış dəyər fərqinin həmin ayın əvvəlinə olan ehtiyatların həcminə nisbəti kimi hesablanır və hazır məhsul ehtiyatlarının ay ərzində dinamikasını əks etdirir.

Sənaye istehsalında mal ehtiyatları indeksinin azalması və ya mənfi rəqəmlə ifadə olunması mal ehtiyatlarının azaldığını göstərir ki, bu da öz növbəsində makroiqtisadi baxımdan müsbət indikator hesab olunur, çünki birmənalı olaraq son istehlakın artdığını əks etdirir.

Qeyd edək ki, Azərbaycanda 2010-cu il iyulun 1-nə sənaye müəssisələrinin anbarlarında 253,4 mln. manat həcmində hazır məhsul ehtiyatı olub, bu da iyunun əvvəli ilə müqayisədə 15,9 mln. manat azdır.