Sənaye və energetika

Ana səhifə

Azərbaycan Dövlət Neft Fondunun valyuta məzənnələrinin I yarımillikdə dəyişməsindən yaranan fərqlə bağlı xərcləri 869 mln. manat olub

02 avqust 2010 10:05 (UTC +04:00)

Fonddan «APA-Economics»ə verilən məlumata görə, gəlirlərin tərkibində neft və qaz sazişlərinin həyata keçirilməsi ilə bağlı daxilolmalar 6 089,3 mln. manat, o cümlədən mənfəət nefti və qazın satışından 6 000,1 mln. manat, Bakı-Tiflis-Ceyhan boru kəməri layihəsi üzrə dividendlərdən 83,2 mln. manat, tranzitdən 4,3 mln. manat, xarici sərmayəçilər tərəfindən təhvil verilmiş aktivlərdən 0,9 mln. manat, akr hesabı ödənişlərdən 0,8 mln. manat əldə edilib.

Ötən 6 ay ərzində Neft Fondunun vəsaitlərinin idarə olunmasından əldə olunan gəlir isə 11,9 mln. manata bərabər olub.

Hesabat dövrü ərzində Dövlət Neft Fondunun 2010-cu il büdcəsinin icrası çərçivəsində 2 455,0 mln. manat dövlət büdcəsinə transfer edilib. Bundan başqa, qaçqın və məcburi köçkün ailələrinin məskunlaşdırılması və sosial-məişət vəziyyətinin yaxşılaşdırılması üzrə tədbirlərin həyata keçirilməsinə 34 mln. manat, Samur-Abşeron suvarma sisteminin yenidən qurulması və Oğuz-Qəbələ zonasından Bakı şəhərinə su kəmərinin çəkilişi layihələrinin maliyyələşdirilməsi məqsədilə isə müvafiq olaraq 74,8 mln. manat və 53 mln. manat vəsait ayrılıb. «2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı»nın maliyyələşdirilməsinə ARDNF-dən 2,8 mln. manat vəsait ayrılıb. Əlavə olaraq 1,5 mln. manat Bakı-Tiflis-Qars yeni dəmir yolu layihəsinin maliyyələşdirilməsinə yönəldilib. Fondun idarə edilməsi ilə bağlı xərclər isə 9,1 mln. manat olub.

Valyuta məzənnələrinin dəyişməsindən yaranan fərqlə bağlı Fondun büdcədənkənar xərcləri 869,1 mln. manat təşkil edib.

Cari ilin iyul ayının 1-ə Fondun aktivləri ilin əvvəlinə (14 900,4 mln. ABŞ dolları) nisbətən 21,6% artaraq 18 122,3 mln. ABŞ dollarına bərabər olub.