Sənaye və energetika

Ana səhifə

«Nabucco» layihəsi çərçivəsində Bolqarıstan-Türkiyə qaz kəmərinin inşasına yaxın bir ildə başlanacaq

03 avqust 2010 08:06 (UTC +04:00)

«APA-Economics»in məlumatına görə, bu barədə Bolqarıstanın iqtisadiyyat naziri Traiko Traikov bildirib.

Nazirin sözlərinə görə, Avropa İttifaqı layihəyə 200 mln. avro vəsait ayıracaq. Yeni boru kəməri «Nabucco» üçün müəyyən edilmiş tələblərə tam cavab verəcək.

T.Traikov həmçinin bildirib ki, Bolqarıstan və Yunanıstanın qaz nəqliyyat şəbəkələrinin əlaqələndirilməsi layihəsinə yenidən baxılır. Çünki əvvəlki hökumət tərəfindən hazırlanmış layihə Bolqarıstanın maraqlarına cavab verməyib.

Qeyd edək ki, Xəzər regionundan Türkiyə və Balkan yarımadası vasitəsilə Mərkəzi Avropaya təbii qazın ixracı üçün nəzərdə tutulan «Nabucco» kəmərinin inşası məqsədilə yaradılan «Nabucco Gas Pipeline İnternational GmbH.» konsorsiumuna OMV (Avstriya), MOL (Macarıstan), «Transgaz» (Rumıniya), «Bulgargaz» (Bolqarıstan), «BOTAŞ» (Türkiyə) və RWE (Almaniya) şirkətləri qoşulub. Hər bir tərəfdaş şirkətin konsorsiumda payı 16,67% təşkil edir. Layihənin xərclərinin 1/3-i səhmdarlar tərəfindən, qalan hissəsi isə maliyyə-kredit təşkilatları tərəfindən maliyyələşdiriləcək. Bu yaxınlarda layihənin ümumi investisiya dəyəri 4,6 mlrd. avrodan 7,9 mlrd. avroyadək (12,3 mlrd. ABŞ dolları) artırılıb. Boru xəttinin uzunluğu 3 300 km olacaq, illik nəqletmə gücü isə 31 mlrd. kubmetr həcmində nəzərdə tutulub. Layihə çərçivəsində ilk qazın artıq 2013-cü ildən sonra Avropaya çatdırılması planlaşdırılır.