Sənaye və energetika

Ana səhifə

Azərbaycan Dövlət Neft Şirkəti yanvar-iyul aylarında təbii qazın təhvili üzrə proqnozu 11% artıq icra edib

04 avqust 2010 15:07 (UTC +04:00)

Bakı. Rəşad Süleymanov – APA-Economics. Azərbaycan Dövlət Neft Şirkəti (ARDNŞ) bu ilin iyul ayında Azərbaycanın təbii qaz təchizatı sisteminə 908,952 mln. kubmetr qaz verib. Bu barədə «APA-Economics»ə ARDNŞ-dən məlumat verilib.

Ay ərzində yeraltı qaz anbarlarına 291,436 mln. kubmetr «mavi yanacaq» vurulub. Bununla da iyul ayı ərzində 617,516 mln. kubmetr qaz istifadə olunub. Bu həcmdən sənaye, əhali və «Azərenerji» ASC-nin istifadəsinə 507,305 mln. kubmetr təbii qaz verilib, Gürcüstana 12,935 mln. kubmetr, Rusiyaya 66,435 mln. kubmetr qaz ixrac olunub. Naxçıvan Muxtar Respublikasının qaz təminatı üçün isə İrana 30,841 mln. kubmetr təbii qaz ötürülüb.

Şirkətdən bildirilib ki, cari ilin yanvar-iyul aylarında ARDNŞ Azərbaycanın yanacaq-enerji balansında təbii qazın təhvili üzrə nəzərdə tutulmuş öhdəlikləri artıqlaması ilə yerinə yetirib. Hesabat dövründə ARDNŞ ölkənin təbii qaz təchizatı sisteminə 6 616,350 mln. kubmetr «mavi yanacaq» verib ki, bu da proqnozda nəzərdə tutulandan 11,2% və ya 668,450 mln. kubmetr çoxdur. Bundan başqa, ölkə sənayesinin, əhalinin təbii qazla tam təmin olunması və xaricə qazın ixracı ilə əlaqəli bağlanmış müqavilə öhdəliklərini yerinə yetirmək məqsədi ilə yeraltı qaz anbarlarından əlavə olaraq 630,926 mln. kubmetr «mavi yanacaq» götürülüb. Yeraltı qaz anbarlarına əlavə olaraq 857,772 mln. kubmetr qaz vurulub. Ümumilikdə, 2010-cu ilin yanvar-iyul ayları ərzində 6 389,504 mln. kubmetr qaz istifadə olunub. Bu həcmdən sənaye, əhali və «Azərenerji» ASC-nin istifadəsinə 5 464,309 mln. kubmetr təbii qaz verilib. Gürcüstana 219,982 mln. kubmetr, Rusiyaya 494,648 mln. kubmetr qaz ixrac olunub. Naxçıvanın qaz təminatı üçün isə İrana 210,565 mln. kubmetr «mavi yanacaq» ötürülüb.