Sənaye və energetika

Ana səhifə

Azərbaycan prezidenti «Akkord» Şirkətlər Qrupunun Qranit-Mərmər Zavodunun açılış mərasimində iştirak edib

09 avqust 2010 17:07 (UTC +04:00)

«Akkord» Şirkətlər Qrupunun İctimaiyyətlə Əlaqələr Departamentindən APA-ya verilən məlumata görə, müəssisənin açılışında ölkə prezidenti İlham Əliyev iştirak edib.

Şirkətlər Qrupundan bildirilib ki, ölkədə qranit və mərmər məhsullarının istifadəsinə artan tələbat bu istehsal sahəsinin genişləndirilməsi zərurətini yaradıb və «Akkord» tərəfindən genişmiqyaslı tikinti-yenidənqurma işləri həyata keçirilməklə daha müasir avadanlıqlarla təchiz olunmuş və geniş istehsal imkanlarına malik qapalı sahəsi 18 min kv. metr, ümumilikdə 80 min kv. metr sahəsi olan zavod inşa edilib. Zavodun inşası və yenidən qurulmasına ümumilikdə 19 mln. manat sərf olunub ki, bunun da 3,5 mln. manatı Sahibkarlığa Kömək Milli Fondunun güzəştli krediti və Şirkətlər Qrupunun sərmayəsi hesabına həyata keçirilib.

Zavodun açılış mərasimində iştirak edən İ.Əliyev ilk olaraq Müasir Sərgi Salonu ilə tanış olub və orada İran, Norveç, Braziliya, Türkiyə, Hindistan, İtaliya və s.-dən gətirilmiş mərmər, qranitdən hazırlanmış müxtəlif nümunələrlə tanış olub. Sonra isə qranit sexində olan ölkə başçısı orada da aylıq istehsal gücü 70 min kv. metr olan zavodun istehsal prosesinə start verən düyməni basıb.

«Akkord» Şirkətlər Qrupunun sahibi İlqar Hacıyev bildirib ki, artıq burada emal edilən məhsullar təkcə yerli bazar və şirkətin öz tələbatı üçün deyil, eyni zamanda, ixrac üçün də nəzərdə tutulub. O, texniki göstəricilərinə görə yüksək keyfiyyətli məhsullar istehsal edilməsi məqsədi ilə zavodda avtomatik idarə edilən dəzgahlar, həmçinin zavodun bütün sexlərində ekologiyanın qorunması məqsədilə su arıtma sistemlərinin quraşdırıldığını bildirib. İ.Hacıyev xüsusi vurğulayıb ki, artıq şirkətin Azərbaycanda 2 Ağlay ocağı, Türkiyədə Bej Mərmər ocağı, Ukraynada isə qranit ocaqları var. Şirkətin 2009-2010-cu illər üçün nəzərdə tutulmuş inkişaf planına uyğun olaraq, Qranit-Mərmər Zavodunun ərazisində yeni istehsal sahələri və Avropa standartlarına uyğun idarəetmə və xidmət binaları inşa olunub. Binalardan Ağlay sexi 2,3 min kv. metr, qranit sexi 1,480 min kv. metr, mərmər sexi 1,030 min kv. metr, brusçatka sexi 640 kv. metr, 3 mərtəbəli inzibati bina 1,050 min kv. metr, 3 mərtəbəli yeni sərgi salonu 860 kv. metr və s. təşkil edir. Həmçinin, burada işçilər üçün 1 470 kv. metrlik 2 mərtəbəli yeməkxana inşa edilib. Zavodda və daş karxanalarında ümumilikdə 200-dən artıq işçi daimi işlə təmin olunub.