Sənaye və energetika

Ana səhifə

Azərbaycanın «Təmiz Şəhər» ASC Avropa Davamlı Enerji Kampaniyasının rəsmi tərəfdaşı seçilib

10 avqust 2010 07:16 (UTC +04:00)

Bakı. Rəşad Süleymanov – APA-Economics. Azərbaycan İqtisadi İnkişaf Nazirliyi və Fransanın «CNIM S.A» şirkəti arasında imzalanmış müqaviləyə əsasən, Bakı şəhərində tikilən bərk məişət tullantılarının yandırılması zavodu və onun əsas benefisiarı olacaq «Təmiz Şəhər» ASC Avropa Davamlı Enerji Kampaniyası (Sustainable Energy Europe Campaign) layihəsinin rəsmi tərəfdaşı elan edilib. Bu barədə «APA-Economics»ə «Təmiz Şəhər» ASC-dən məlumat verilib.

Tullantıların yandırılması zavodu ildə 500 min ton bərk məişət tullantılarını və 10 min ton tibbi tullantını utilizasiya etmək gücündə olacaq. Bu cür müəssisələr dünyada daha çox «Tullantıdan Enerjiyə» zavodları kimi tanınır. Bakıda inşa olunan məişət tullantılarının yandırılması zavodu ildə 231,5 mln. kVt/saat elektrik enerjisi istehsal edəcək. Zavodun fəaliyyəti nəticəsində tullantıların ümumi kütləsi 3, həcmi isə 10 dəfə azalacaq. Zavodun 2012-ci ilin sonunda istismara verilməsi planlaşdırılır.

Balaxanı bərk məişət tullantılarının yandırılması zavodu tullantı zavodlarının dördüncü nəslinə aiddir və ətraf mühitin çoxsəviyyəli mühafizəsi mexanizminə malik olmaqla, həm Azərbaycanın, həm də Avropa İttifaqının ən sərt ekoloji normativlərinə tam cavab verəcək.

Qeyd edək ki, Avropa Davamlı Enerji Kampaniyası Avropa İttifaqı çərçivəsində 2005-ci ildə təsis edilib. Son 5 ildə Avropanın 90 böyük təşkilatı bu layihəyə qoşulub. Layihənin əsas məqsədləri ictimaiyyətin, yerli və regional səviyyədə vacib qərar qəbul edən şəxslərin davamlı enerji barədə məlumatlığını artırmaq, tərəfdaşlar üçün qabaqcıl təcrübənin öyrənilməsi və təbliği üçün imkan yaratmaq, davamlı enerji texnologiyalarına özəl sərmayələrin cəlb edilməsini stimullaşdırmaqdır. Hazırda Avropa Davamlı Enerji Kampaniyası layihəsinin rəsmi tərəfdaşları bərpa olunan enerji mənbələrindən istifadə, enerjiyə qənaət və enerji istehlakının səmərəliliyi sahəsində 500-dən çox layihə həyata keçirir.