Sənaye və energetika

Ana səhifə

«Azersun Holding» Masazır Duz Zavodunun media nümayəndələri üçün təqdimatını keçirilib

11 avqust 2010 11:00 (UTC +04:00)

Bakı. Rəşad Süleymanov – APA-Economics. Bu gün bir qrup KİV nümayəndəsi «Azersun Holding» Şirkətlər Qrupuna daxil olan Masazır Duz Zavodunda olub. «APA-Economics»in məlumatına görə, media nümayəndələri «Bizim Duz» və «Azərduz» markalı duzların istehsal prosesi ilə tanış olublar. Zavodun fəaliyyəti, iş rejimi, istehsal sahələri və yodlaşdırılmış duzun ərsəyə gələnə qədər keçdiyi prosedurlar barədə məlumatlandırılıblar.

Zavodun direktoru Əlikamal Yılmaz bildirib ki, iyulun 21-də prezident İlham Əliyevin iştirakı ilə açılan Masazır Duz Zavodu Azərbaycanda ilk dəfə sənaye üsulu ilə emal edilmiş, təmizlənmiş və yodlaşdırılmış duz istehsal edir.

«Dünya standardlarına cavab verən yüksək səviyyəli texnologiya ilə çalışan Masazır duz zavodu hazırda 130 nəfəri işlə təmin edir. Duz zavodunun gündəlik emal gücü 100 tondur. Zavod tam gücü ilə işə düşdükdən sonra 300 ton duz istehsal ediləcək. İldə 90 min ton ən yüksək standartlara uyğun yodlaşdırılmış duz istehsal edən zavod Azərbaycanı duz idxalçısından ixracatçısına çevirmək iqtidarındadır», - deyə zavod direktoru bildirib.

Zavod rəhbəri qeyd edib ki, yodlaşdırılmış süfrə duzu olan «Azərduz» insan sağlamlığına xidmət edir. Uzun sürən çalışmalar nəticəsində ərsəyə gələn Masazır Duz Zavodu hazırda istehsal etdiyi «Azərduz» ilə ölkə bazarlarında və satış şəbəkələrində yod çatışmazlığı problemi ilə mübarizə aparır.

Jurnalistlərə məlumat verilib ki, zavodun əsas xammal mənbəyi Masazır duz gölüdür. Texnoloji sxemdə xam duzdan istifadə olunması da nəzərdə tutulur. Bu yalnız qış aylarında göldəki duz konsentrasiyası aşağı olan tətbiq olunur. Xam duz anbarının tutumu 6 min ton təşkil edir.

Zavod rəhbəri onu da bildirib ki, hazırda müəssisədən yodlaşdırılmış duz 750 qram, 1,5 kq, 3 kq və 25 kq-lıq kisələrdə satışa çıxarılır. Müəssisə heyvandarlıq sektoru və sənayenin digər sahələrində istifadə üçün də duz istehsal edir.

Qeyd edək ki, Azərbaycan İnvestisiya Şirkətinin də payçı kimi iştirak etdiyi zavodun tikintisinə 16 mln. manat investisiya qoyulub. Daha 4 mln. manat investisiyanın yatırılması nəzərdə tutulur. Zavodun tikintisi ilə yanaşı ətraf ərazidə abadlaşdırma işləri aparılıb, yol çəkilib.