Sənaye və energetika

Ana səhifə

Rusiya və Azərbaycan gələn il üçün təbii qazın alqı-satqısı qiyməti ilə bağlı hələ razılığa gələ bilməyib

18 avqust 2010 12:18 (UTC +04:00)

«APA-Economics»in məlumatına görə, bunu Azərbaycan və Rusiya arasında 2010-cu ilin birinci yarısında aparılan ticarət əməliyyatlarının yekunlarına dair bu gün Bakıda keçirilən mətbuat konfransında Rusiyanın Azərbaycandakı ticarət nümayəndəsi Yuri Şedrin bildirib.

Onun sözlərinə görə, 2010-cu ilin yanvar-iyun aylarında Azərbaycandan Rusiyaya 428,2 mln. kubmetr qaz ixrac olunub, ilin sonunadək isə bu rəqəm müvafiq müqaviləyə əsasən 1 mlrd. kubmetr təşkil edəcək: «Gələn il üçün Azərbaycandan Rusiyaya qazın ixracına dair isə danışıqlar hələ davam etdirilir və hələ konkret razılıq əldə olunmayıb. Buna səbəb isə qazın qiymətidir».

Y.Şedrin onu da qeyd edib ki, 2011-ci ildə Azərbaycan Rusiyaya illik qaz ixracını 2 mlrd. kubmetrə artırmaq üçün qazın nəqli marşrutunda qaz kompressor təsərrüfatını yaxşılaşdırmalıdır və artıq Azərbaycan Dövlət Neft Şirkəti bu işlərə start verib: «Tərəflər arasında qiymət məsələsi ilə bağlı razılıq əldə olunarsa, qazın həcmini 2 mlrd. kubmetrə çatdırılması da mümkün olacaq».

Qeyd edək ki, bu ilin yanvar ayının əvvəlindən Azərbaycandan Rusiyaya «mavi yanacağın» ixracına başlanılıb. İlk öncə qaz ixracının illik həcmi 500 mln. kubmetr səviyyəsində nəzərdə tutulsa da, sonradan tərəflər bu rəqəmin iki dəfə artırılması barədə razılığa gəlib. Lakin qazın satış qiyməti rəsmən açıqlanmayıb.