Sənaye və energetika

Ana səhifə

ARDNŞ prezidenti «SOCAR Yay Məktəbi»nin iştirakçıları ilə görüşüb

01 sentyabr 2010 15:17 (UTC +04:00)

Bakı. Nicat Mustafayev - APA-Economics. Bu gün Bakıda Azərbaycan Respublikası Dövlət Neft Şirkətinin (ARDNŞ) prezidenti Rövnəq Abdullayev «SOCAR Yay Məktəbi»nin iştirakçıları ilə görüşüb.

«APA-Economics»in məlumatına görə, görüş zamanı R.Abdullayev ölkənin neft-qaz sənayesi tarixi, hazırda ARDNŞ-ın fəaliyyəti haqda məlumat verib.

O qeyd edib ki, hazırda şirkət Gürcüstan və Türkiyə kimi ölkələrdə iri layihələr həyata keçirir: «Bütün bu layihələri reallaşdırmaq üçün peşəkar kadrlar olmalıdır. Məhz bu səbəbdən ARDNŞ «SOCAR Yay Məktəbi» adlı pilot layihəsini həyata keçirir. Eyni zamanda, şirkətin təşəbbüsü ilə hazırda xarici ölkələrdə 102 tələbə təhsil alır, 50-si isə artıq xarici universitetlərin məzunu kimi şirkətdə işlə təmin olunub. Ümumiyyətlə, indiyədək 260 tələbə ARDNŞ-a işə götürülüb. Belə ki, kadr siyasəti şirkətin prioritet sahələrindən biridir».

Qeyd edək ki, ARDNŞ-ın maddi dəstəyi ilə tələbələr üçün təşkil olunmuş «SOCAR Yay Məktəbi»ndə 30 nəfər (21 oğlan, 9 qız) iştirak edir. İştirakçılar avqustun 29-dan sentyabrın 6-dək Şıx çimərliyində yerləşən «Ramada» hotelində qalacaqlar. Enerji sektorunun bütün sahələrini - neft-qaz yataqlarının geologiya-geofizikası, quyuların qazılması, neft-qaz hasilatı, nəqli və saxlanması, neft-qaz emalı və neft kimyası, ekoloji normalar və alternativ enerji mənbələri, neft-qaz hasilatı və emalı sənayesinin iqtisadiyyatı, neft və neft məhsullarının satışı sahələrini əhatə edəcək Yay Məktəbinin iştirakçıları interaktiv formada şirkətin rəhbər işçilərinin mühazirələrini dinləyəcək, praktiki məşğələlər keçəcək, ARDNŞ-ın idarə və müəssisələrinə ekskursiya edəcəklər.