Sənaye və energetika

Ana səhifə

Macarıstan AGRİ layihəsinə qoşulmaq qərarına gəlib

03 sentyabr 2010 10:56 (UTC +04:00)

Bakı. Vikoriya Dementyeva - APA. Macarıstan AGRİ (Azerbaijan-Georgia-Romania Interconnector) birgə enerji layihəsinə qoşulacaq.

APA-nın “Ukrinform”a istinadən xəbərinə görə, bu barədə Rumıniya prezidenti Trayan Basesku Buxarestdə Macarıstanın xarici işlər naziri Yanoş Martonla keçirdiyi danışıqlardan sonra açıqlama verib.

T.Basesku Macarıstanın layihəyə qoşulmasının əvvəlcədən gözlənilən olduğunu deyib. O bildirib ki, bu ilin sonunadək qaz nəqli sistemi hazır olacaq ki, bu da Avstriya, Rumıniya və Macarıstanın qaz şəbəkələrini birləşdirəcək. Bununla da Xəzər regionunun maye qazı Avropa İttifaqının ayrı-ayrı ölkələrinə nəql oluna biləcək.

Qeyd edək ki, sentyabrın 14-də Bakıda AGRİ layihəsinə dəstək məqsədilə Azərbaycan, Gürcüstan və Rumıniya prezidentlərinin zirvə görüşünün keçirilməsi planlaşdırılır.

Xatırladaq ki, Rumıniya, Azərbaycan və Gürcüstan arasında AGRİ (Azerbaijan-Georgia-Romania Interconnector) layihəsinin reallaşması ilə bağlı anlaşma memorandumu 2010-cu ilin aprelin 13-də Buxarestdə imzalanıb. AGRİ layihəsi gələcəkdə Azərbaycan təbii qazının boru xətləri vasitəsilə Gürcüstanın Qara dəniz sahillərinə nəql olunması, burada xüsusi terminalda sıxılaraq, Qara dəniz vasitəsilə tankerlə Rumıniyanın Konstansa limanındakı terminala çatdırılması, daha sonra isə yenidən bu ölkənin ərazisində mövcud qaz infrastrukturu şəbəkəsi ilə Rumıniya və digər Avropa ölkələrinin tələbatlarının ödənilməsini nəzərdə tutur. Gələcəkdə Azərbaycan qazını Avropa İttifaqına üzv olan ölkələrə ixrac etmək üçün Konstansadan Bolqarıstan və Macarıstana iki ayrı boru kəmərinin çəkilməsi də nəzərdə tutulur. Layihənin birinci mərhələsində hər il 8 mlrd. kubmetr, gələcəkdə isə 20 mlrd. kubmetr həcmində qazın nəqli planlaşdırılır. 4-6 mlrd. avro dəyərləndirilən layihə çərçivəsində Konstansa və Kulevi limanlarında maye qaz terminalları yaradılacaq.