Sənaye və energetika

Ana səhifə

Vladimir Putin: «Nabucco» layihəsinin uğur qazanmaq şansı azdır

07 sentyabr 2010 00:49 (UTC +04:00)

Bakı-APA. «Cənub axını» da «Şimal axını» kimi tez tikiləcək. Rusiya hökumətinin başçısı Vladimir Putin belə bir bəyanatla çıxış edib.

«Biz artıq Baltik dənizinin dibi ilə qaz kəmərinin çəkilişinə başlamışıq və gələn il qaz bu boru ilə gedəcək. Biz bu işi sürətlə görürük və «Cənub axını»nı da sürətlə tikəcəyik», deyə baş nazir bildirib.

Rusiya baş naziri hesab edir ki, «Nabucco» layihəsinin uğur qazanmaq şansı azdır.

««Nabucco»nun əsas problemi bu borunu doldurmaq üçün lazım olan həcmlərin olmamasıdır. Rusiya ora heç nə verməyəcək, İranda bu yataqlar hələ işlənməyib, Azərbaycanda həcmlər kiçikdir, bundan əlavə Azərbaycan Rusiyaya qaz ötürülməsi barədə saziş imzalayıb», deyə Putin qeyd edib.

«Bundan əlavə Türkmənistan var, amma hələlik həcm üzrə imkanlar məlum deyil, çünki Türkmənistanın ərazisindən Çinə 30 milyard kubmetrlik qaz borusu çəkilib», deyə o əlavə edib.

Bundan əlavə, Rusiya hökumət başçısının sözlərinə görə, bu layihənin həyata keçməsinə mane olan digər çətinliklər də var. «Xəzər dənizinin bölünməsi üzrə Türkmənistan və Azərbaycan arasında ərazi mübahisəsi var. Belə şəraitdə yumşaq desək, boru çəkmək çətindir, bəlkə də mümkün deyil», deyə Putin vurğulayıb.

Onun fikrincə, bütün bunlar, «Nabucco»nun reallaşmasını böyük sual altına qoyur. «Amma mən nəzəri cəhətdən çoxillik müqavilələr bağlamamış layihəyə milyardlar yatıra biləcək şirkətin ortaya çıxacağını istisna etmirəm», deyə baş nazir istehza ilə bildirib.