Sənaye və energetika

Ana səhifə

Azərbaycan, Gürcüstan və Rumıniya oktyabrda AGRI layihəsi üzrə müştərək müəssisə yaradacaq

13 sentyabr 2010 11:20 (UTC +04:00)

Bakı. Nicat Mustafayev – APA-Economics. Artıq bu ilin oktyabr ayında Azərbaycan, Gürcüstan və Rumıniya AGRI (Azerbaijan-Georgia-Romania Interconnector) layihəsinin texniki-iqtisadi əsaslandırmasını hazırlayacaq birgə müəssisə yaradıla bilər. «APA-Economics»in məlumatına görə, bunu Azərbaycanın sənaye və energetika naziri Natiq Əliyev bildirib.

Nazirin sözlərinə görə, Buxarestdə yaradılacaq birgə müəssisənin əsasnaməsi oktyabr ayında müzakirə olunacaq: «Oktyabrın ilk dekadasında Buxarestdə hər üç ölkənin işçi qrupu yeni şirkətin əsasnaməsini müzakirə edərək təsdiqləyəcək».

Nazir həmçinin bildirib ki, layihə dövlət səviyyəsində deyil özəl şirkət və təşkilatlar tərəfindən maliyyələşdiriləcək.

Qeyd edək ki, Azərbaycan, Gürcüstan və Rumıniya arasında AGRI layihəsinin reallaşması ilə bağlı anlaşma memorandumu 2010-cu il aprelin 13-də Buxarestdə imzalanıb. Layihə çərçivəsində gələcəkdə Azərbaycan təbii qazının Qara dəniz sahillərinə nəql olunması, burada xüsusi terminalda sıxılması, Qara dəniz vasitəsilə tankerlə Rumıniyanın Konstansa limanındakı terminala çatdırılması, daha sonra isə yenidən bu ölkənin ərazisində mövcud qaz infrastrukturu şəbəkəsi ilə Rumıniya və digər Avropa ölkələrinin tələbatlarının ödənilməsinə yönəldilməsi planlaşdırılır. Rumıniyaya Gürcüstan vasitəsilə göndəriləcək Azərbaycan qazının ilk versiyada həcmi 2 mlrd. kubmetr, ikinci versiyada – 5 mlrd. kubmetr, üçüncü versiya üzrə isə 8 mlrd. kubmetr təşkil edəcəyi gözlənilir. Həcmdən asılı olaraq layihənin dəyəri də 1,2-4,5 mlrd. avro məbləğində dəyişə bilər. Lakin yekun həcm və məbləğ texniki-iqtisadi əsaslandırma hazır olandan sonra müəyyənləşəcək.