Sənaye və energetika

Ana səhifə

Bakıda Kimyəvi Məhsulların Təhlükəsizliyinin Tənzimlənməsi, Avropa reqlamentləri və BMT tövsiyələri üzrə beynəlxalq konfrans keçiriləcək

14 sentyabr 2010 13:56 (UTC +04:00)

Bakı. Nicat Mustafayev - APA-Economics. Sentyabrın 15-16-da Bakıda Kimyəvi Məhsulların Təhlükəsizliyinin Tənzimlənməsi, Avropa reqlamentləri və BMT tövsiyələri (REACH və CLP) üzrə MDB ölkələrinin III beynəlxalq konfransı keçiriləcək.

Azərbaycan Standartlaşdırma, Metrologiya və Patent üzrə Dövlət Komitəsindən «APA-Economics»ə verilən məlumata görə, Avropa İttifaqının kimyəvi maddələrin qeydiyyatına, qiymətləndirilməsinə, icazəsinə və məhdudiyyətlərinə dair REACH Texniki Reqlamenti AB ölkələrinin ərazisinə ildə 1 tondan çox kimyəvi maddə gətirən istehsalçılara aiddir.

Reqlamentə əsasən, Avropa Birliyinin (AB) ərazisinə ildə 1 tondan çox kimyəvi maddə gətirən istehsalçılar Avropa Kimya Agentliyində (AKA) qeydiyyatdan keçməlidir. Bu ilin sonundan etibarən AKA-da qeydiyyatdan keçməyən kimyəvi maddə istehsalçıları üçün AB-nin ərazisinə mal gətirməyə qadağa qoyulacaq. Bu reqlament AB-yə daxil olmayan ölkələrin kimyəvi maddə istehsalçıları qarşısında bir sıra maneələr yaradır.

REACH reqlamentinin tətbiqi ilə meydana çıxan maneələrin aradan qalıdırılması üçün MDB ölkələri və MDB-nin Standartlaşdırma Şurasının təşəbbüsü ilə indiyə kimi 2 konfrans təşkil edilib, növbəti konfrans Bakıda keçiriləcək. Tədbirdə dövlət qurumları, beynəlxalq təşkilatlar və maraqlı şirkətlərin nümayəndələri iştirak edəcək.