Sənaye və energetika

Ana səhifə

«Şahdəniz» qaz yatağının işlənməsi layihəsinin ikinci fazası üzrə son investisiya qərarı bir il sonra veriləcək

15 sentyabr 2010 07:13 (UTC +04:00)

«APA-Economics»in məlumatına görə, bunu Azərbaycan Dövlət Neft Şirkətinin (ARDNŞ) qaz ixracı idarəsinin müdiri Kamal Abbasov bildirib.

K.Abbasovun sözlərinə görə, artıq ARDNŞ «Şahdəniz»in ikinci fazası çərçivəsində investisiyalara dair danışıqların aparılmasında aparıcı rol oynaması barədə mandat əldə edib: «Layihənin ilkin investisiya qərarı gələn ilin mart ayında, sonuncu qərar isə oktyabr ayında veriləcək».

Qeyd edək ki, «Şahdəniz» layihəsində BP (operator – 25,5%), «Statoil» (25,5%), ARDNŞ (10%), «LUKoil» (10%), NIKO (10%), «Total» (10%) və TPAO (9%) şirkətləri iştirak edir.

Cari ilin birinci yarısında «Şahdəniz» yatağından təxminən 3,6 mlrd. kubmetr qaz və 1 mln. ton (7,7 mln. barel) kondensat hasil edilib. Hesabat dövründə yataqdan gündəlik orta hesabla təxminən 20 mln. kubmetr qaz və 42 700 barel kondensat hasil olunub. Bütün il üçün «Şahdəniz» üzrə hasilat planı 7,6 mlrd. kubmetr qaz və 2,01 mln. ton kondensat təşkil edir.

Xatırladaq ki, 2006-ci ilin sonunda – «Şahdəniz»də hasilat başlanandan 2010-cu il ikinci rübün sonunadək yataqdan dünya bazarlarına 42,4 mln. barel kondensat ixrac edilib. Hesabat dövründə yataqdakı 4 quyudan sabit şəkildə Azərbaycan, Gürcüstan və Türkiyə sərhədindəki satış məntəqələrinə qaz çatdırılıb. «Şahdəniz» Mərhələ-1 qazı Azərbaycana, GOGC (Gürcüstan) şirkətinə, BOTAŞ-a və «BTC Co.»ya satılıb.