Sənaye və energetika

Ana səhifə

Bakıda kimyəvi məhsulların təhlükəsizliyinin tənzimlənməsi ilə bağlı beynəlxalq konfransı keçirilir

15 sentyabr 2010 11:28 (UTC +04:00)

Bakı. Vahab Rzayev – APA-Economics. Bu gün Bakıda Kimyəvi məhsulların təhlükəsizliyinin tənzimlənməsi, Avropa reqlamentləri və BMT tövsiyələri (REACH və CLP) üzrə MDB ölkələrinin III beynəlxalq konfransı işə başlayıb. «APA-Economics»in məlumatına görə, konfrans Azərbaycan Standartlaşdırma, Metrologiya və Patent üzrə Dövlət Komitəsinin təşəbbüsü və təşkilatçılıği ilə keçirilir.

Konfransa həsr olunmuş məlumatlarda qeyd olunub ki, Avropa İttifaqının kimyəvi maddələrin qeydiyyatına, qiymətləndirilməsinə, icazəsinə və məhdudiyyətlərinə dair REACH Texniki Reqlamenti Aİ ölkələrinin ərazisinə ildə 1 tondan çox kimyəvi maddə gətirən istehsalçılara aiddir. Reqlamentə əsasən, Avropa İttifaqının ərazisinə ildə 1 tondan çox kimyəvi maddə gətirən istehsalçılar Avropa Kimya Agentliyində (AKA) qeydiyyatdan keçməlidir. Bu ilin sonundan etibarən AKA-da qeydiyyatdan keçməyən kimyəvi maddə istehsalçıları üçün Aİ-nin ərazisinə mal gətirməsinə qadağa qoyulacaq. Bu reqlament Aİ üzvü olmayan ölkələrin kimyəvi maddə istehsalçıları qarşısında bir sıra maneələr yaradır.

REACH reqlamentinin tətbiqi ilə meydana çıxan maneələrin aradan qaldırılması üçün MDB ölkələri və MDB-nin Standartlaşdırma Şurasının təşəbbüsü ilə indiyə kimi 2 konfrans təşkil edilib.

Bakı konfransında çıxış edən Dövlət Komitəsinin aparat rəhbəri Arif Əşrəfov bildirib ki, Azərbaycanda son illər ərzində sürətli iqtisadi inkişaf, o cümlədən sənaye sahəsinin inkişafı, kimya sənayesinin Azərbaycan üçün ənənəvi olaraq əsas sənaye sahələrindən biri olması və bu sahəyə diqqətin yetirilməsi kimya məhsullarının təhlükəsizliyinin tənzimlənməsi məsələlərini aktuallaşdırıb. Bu baxımından keçirilən konfrans böyük əhəmiyyət daşıyır ki, REACH reqlamenti barədə fikir mübadiləsi, təcrübə mübadiləsi, reqlamentin aspektlərinin açıqlanması və bu kimi məsələlər çox vacibdir.

Konfransda həmçinin Rusiya Texniki tənzimləmə və metrologiya üzrə Federal Agentliyin sədr müavini Aleksandr Zajiqalkin, Rusiya Kimyaçılar İttifaqının icraçı direktoru İqor Kukişkin, Standartlaşdırma, metrologiya və sertifikatlaşdırma üzrə Dövlətlərarası Şuranın icraçı katibi Nikolay Sonets çıxıb ediblər. Onlar öz çıxışlarında da konfransın böyük əhəmiyyətə malik olduğunu bildirərək, tədbirin çox vacib olan məqsəd və iş istiqamətləri barədə danışıblar. Bundan sonra konfransın məruzəçiləri REACH reqlamenti, ümumiyyətlə kimya məhsullarının təhlükəsizliyi, onun xüsusiyyətləri və aspektləri barədə çıxış ediblər.

MDB ölkələrindən 60-a yaxın mütəxəssisin iştirak etdiyi konfrans iki gün davam edəcək.