Sənaye və energetika

Ana səhifə

OMV: Yaxın 10-20 il ərzində təbii qaz dünyada strateji yanacaq olacaq

16 sentyabr 2010 11:25 (UTC +04:00)

Bakı. Nicat Mustafayev – APA-Economics. Yaxın 10-20 il ərzində təbii qaz dünyada enerji istehlakı sahəsində strateji yanacaq olacaq. «APA-Economics»in məlumatına görə, bunu sentyabrın 15-16-da Bakıda keçirilən Xəzər dənizi regionunun qaz infrastrukturuna həsr olunmuş «Gas Infrastructure World Caspian-2010» adlı beynəlxalq konfransda çıxış edən Avstriyanın «OMV Gas & Power» şirkəti İdarə Heyətinin üzvü Verner Auli (Werner Auli) bildirib.
Onun sözlərinə görə, hazırda Avropa bazarında qaza olan tələbat ilbəil artır, istehsal isə getdikcə azalır. Nəticədə, Rusiyadan Avropaya ixrac olunan mavi yanacağın həcmi artır.
Avropanın qaz yataqlarının olduğunu bildirən V.Auli həmçinin qeyd edib ki, Polşa və Ruminiya kimi ölkələrdə şist qaz yataqları mövcuddur. Lakin onların işlənməsinə və oradan qazın hasilatı üçün ən azı 20 il vaxt tələb olunacaq.
Xəzər regionunda qaz hasilatından və «Nabucco» layihəsinin əhəmiyyətindən danışan V.Auli qeyd edib ki, Azərbaycan bu layihədə əsas qaz ixracatçısı rolunda çıxış edəcək: «Biz «Şahdəniz II»dən ildə 16 mlrd. kubmetr qaz gözləyirik ki, bunun da 8 mlrd. kubmetrinin «Nabucco» qaz kəməri ilə Avropaya çatdırılması planlaşdırılır. Eyni zamanda, layihə çərçivəsində Türkmənistan və İraqla da danışıqlar aparırıq və ümid edirəm ki, bu ölkələr də «Nabucco»ya qoşulacaq. Hazırda İraqla bağlı bir neçə siyasi problemlər yaşanır ki, yaxın aylar ərzində bu problemlərin aradan qaldırılacağına ümid bəsləyirik».
Qeyd edək ki, sentyabrın 15-16-da keçirilən «Gas Infrastructure World Caspian-2010» konfransında uzunmüddətli enerji təhlükəsizliyinə nail olmaqda Xəzər dənizinin rolu, dünyanın enerji tələbatını ödəmək üçün hasilatın artırılması, əldə olunan məhsulların ixraca yönəldilməsi, infrastruktur, logistika, nəqletmə, beynəlxalq və milli neft-qaz şirkətlərinin əməkdaşlıq imkanları, Xəzər dənizində hasil olunan qazın tranzit ölkələr vasitəsilə ixracının inkişafı və digər mövzular ətrafında müzakirələr aparılıb, məruzələr dinlənilib.
Konfransda Azərbaycan Sənaye və Energetika Nazirliyi, Azərbaycan Dövlət Neft Şirkəti və digər dövlət qurumlarının nümayəndələri, «Nabucco Gas Pipeline International GmbH.» şirkətinin prezidenti Reynhard Mitçek, TAP layihəsinin icraçı direktoru Kyetil Tunqland və digər beynəlxalq şirkət və maliyyə institutlarının rəsmiləri iştirak edib, məruzələr oxuyub.
Xatırladaq ki, konfrans Böyük Britaniyanın «Terrapinn» şirkətinin təşkilatçılığı ilə keçiriləcək. APA (Azeri Press Agency) informasiya agentliyi tədbirin rəsmi informasiya tərəfdaşı statusu alıb.