Sənaye və energetika

Ana səhifə

Azərbaycanda 350 perspektiv karbohidrogen strukturu mövcuddur

17 sentyabr 2010 12:47 (UTC +04:00)

Bakı. Nicat Mustafayev – APA-Economics. Xəzərin Azərbaycan sektorunda yerləşən «Şahdəniz» perspektivli strukturunun ehtiyatları hazırda 1,2 trln. kubmetr qaz və 240 mln. ton neft təşkil edir. «APA-Economics»in məlumatına görə, bunu Azərbaycan Dövlət Neft Şirkətinin (ARDNŞ) I vitse-prezidenti Xoşbəxt Yusifzadə bildirib.

Onun sözlərinə görə, «Şahdəniz» qaz yatağının işlənməsi layihəsi Azərbaycanı dünyada qaz hasil edən ölkə kimi tanıdıb. Belə ki, hazırda yataqda gündəlik qaz hasilatı 23 mln. kubmetr təşkil edir: «Yataqda hələ yuxarı horizontlar istifadə olunur. Ümumiyyətlə, «Şahdəniz»in hazırkı qaz ehtiyatları 1,2 trln., neft ehtiyatları isə 240 mln. ton təşkil edir. Bu cür ehtiyatlarla Azərbaycan «Nabucco» qaz kəməri ilə Avropaya öz mavi yanacağını çatdırmaq imkanını əldə edir».

X.Yusifzadə onu da bildirib ki, hazırda Azərbaycanda 350 perspektiv struktur mövcuddur və ümumi qaz ehtiyatları 2 trln. kubmetr təşkil edir: «Bütün perspektivli strukturları nəzərə alsaq, Azərbaycanın mavi yanacaq ehtiyatları 5 trln. kubmetrə çata bilər».

Xatırladaq ki, «Şahdəniz» yatağının işlənməsi layihəsinin ikinci fazası çərçivəsində ölkədə illik qaz hasilatın 30 mlrd. kubmetrə çatacağı proqnozlaşdırılır. Layihənin iştirakçıları BP (əsas operator - 25,5%), «Statoil» (kommersiya operatoru - 25,5%), ARDNŞ (10%), «LUKoil» (10%), NICO (10%), «Total» (10%) və TPAO (9%) şirkətləridir.

Qeyd edək ki, 2015-2030-cu illərdə Azərbaycanın qaz ixracı ildə 30-35 mlrd. kubmetr təşkil edəcək. Eyni zamanda, Türkmənistanın qaz ixracı 145-180 mlrd. kubmetr, Qazaxıstanın isə 60-70 mlrd. kubmetr səviyyəsində proqnozlaşdırılır. Göstərilən miqdardan 15-20 mlrd. kubmetr qazı Azərbaycan Avropaya nəql edə biləcək. Müqayisə etsək Türkmənistan üçün bu göstərici 20-30 mlrd. kubmetr, Qazaxıstan üçün isə 10-15 mlrd. kubmetr səviyyəsində gözlənilir.