Sənaye və energetika

Ana səhifə

“Azəriqaz” İstehsalat Birliyi əhalini ehtiyatlı olmağa çağırır

25 sentyabr 2010 08:46 (UTC +04:00)

Bakı. Vahab Rzayev - APA-Economics. Son dövrlər “Azəriqaz” İstehsalat Birliyində aparılan geniş miqyaslı işlər, həyata keçirilən texniki tədbirlər nəticəsində ölkənin qaz təchizatı sistemində texnoloji proseslər xeyli təkmilləşdirilib, təbii qazın həcminin və təzyiqinin artırılmasına nail olunub.

Bu barədə “APA-Economics”ə Azərbaycan Dövlət Neft Şirkətindən (ARDNŞ) məlumat verilib.

Məlumatda bildirilir ki, “Azəriqaz” tərəfindən mütəmadi olaraq aparılan təbliğat işlərinə baxmayaraq, hələ də ölkə ərazisində təbii qazdan düzgün istifadə edilməsi qaydalarının pozulması hallarına rast gəlinir.

Payız-qış mövsümündə təbii qaza olan tələbatın artmasını, eləcə də bir çox arzuolunmaz hadisələrin yarana biləcəyini nəzərə alaraq, “Azəriqaz” İB-nin mütəxəssisləri qaz təsərrüfatında təhlükəsizlik qaydalarına riayət edilməsi istiqamətində ardıcıl tədbirlər həyata keçirirlər. Bu məqsədlə “Azəriqaz” İB istehlakçılara ictimai binalarda, yaşayış evlərində, təhsil, səhiyyə obyektlərində, idarə və müəssisələrdə təbii qazdan istifadə edən zamanı diqqətli olmaq üçün texniki təhlükəsizlik qaydalarına ciddi əməl etməyi tövsiyə edir.

“Qazdan istifadə Qaydaları”na riayət etməklə abonentlər nəzərə almalıdırlar ki, mənzilə daxil olarkən qaz sızmasının olmadığını təyin etməmiş açıq oddan və elektrik şəbəkəsindən istifadə edilməməli, qaz cihazlarını işə salmazdan qabaq otağın havası dəyişilməli, qaz iyinin olmadığı yəqin edilməlidir. Qaz iyi hiss etdikdə, dərhal bütün kranlar bağlanmalı, mənzilin havası dəyişdirilərək Mərkəzi Qaz Qəza Xidmətinə - 104 nömrəli telefona xəbər verilməlidir. Qaz cihazlarını nəzarətsiz qoymaq, kiçik yaşlı uşaqlara, xəstələrə, qocalara qaz cihazlarını etibar etmək həyat üçün təhlükəlidir. Mənzillərdə qaz borularından digər məişət xidmətləri üçün istifadə etmək düzgün deyil. Qaz cihazları olan otaqda tez alışan məhsulların yerləşdirilməsi və saxlanılması, eləcə də qaz xətlərinin özbaşına çəkilməsi, qaz cihazlarının yerinin dəyişdirilməsi, təmiri və əlavə qaz cihazlarının quraşdırılması qəti qadağandır. Bütün qaz boruları və qaz cihazlarının profilaktik xidmətlər üçün əl çatan və görünən yerlərdə quraşdırılması məqsədəuyğundur. Qaz sobalarının tüstü bacaları, mətbəx və hamam otaqlarının hava dəyişmə yolları qış mövsümü başlamadan əvvəl təmizlənməli və işlək vəziyyətə gətirilməlidir. Uzun müddətə evi tərk etdikdə, qaz cihazlarının bütün ventilləri bağlanmalıdır. Təhsil, səhiyyə, uşaq evləri və digər müəssisələrdə qaz sobalarından istifadə edilməsi üçün məsul şəxslər təyin edilməli və onlar müvafiq qaydada təlimatlandırılmalıdırlar. Qaz cihazlarından istifadə zamanı təhlükəsizlik qaydalarına əməl olunması məsələləri “Azəriqaz” İB tərəfindən daimi nəzarətdə saxlanılır, bu istiqamətdə mütəmadi olaraq monitorinqlər keçirilir, alınmış nəticələr təhlil olunur. Araşdırmalar göstərir ki, bədbəxt hadisələr bir qayda olaraq təhlükəsizlik qaydalarının kobud şəkildə pozulması ilə əlaqədar baş verir.