Sənaye və energetika

Ana səhifə

Azərbaycanda işıq pulunun yığımı 100%-i keçib

29 oktyabr 2010 11:49 (UTC +04:00)

Bakı. Əli Əhmədov – APA-Economics. Azərbaycanda enerjidən istifadə azalsa da, enerji pulunun yığımı artmaqdadır. Sentyabr ayında ölkədə 456,1 mln. kVt/saatdan artıq enerji istehlak edilib ki, bu da ötən ilin sentyabrına nisbətən 1,5 mln. kVt/saat azdır. Bununla yanaşı, ötən ilin sentyabrı ilə müqayisədə enerji pulunun yığımı 13 faiz bəndi artıb və nəticədə, əvvəlki ayların debitor borcları da nəzərə alınmaqla 105% təşkil edib.

«Azərenerji» ASC-dən «APA-Economics»ə verilən məlumata görə, ötən ay əhalinin istifadə elədiyi elektrik enerjisinin həcmi də 2009-cu ilin sentyabrına nisbətən 3,6 mln. kVt/saat azalaraq 151,3 mln. kVt/saat olub. Amma enerji haqqının yığımı 8 faiz bəndi artaraq 94%-i ötüb.

Sentyabrda ən yüksək ödəniş səviyyəsi Füzuli REŞ-də (ötən ayların debitor borcu nəzərə alınmaqla - 173,5%), ən aşağı ödəniş səviyyəsi isə Daşkəsən REŞ-də (70,1%) qeydə alınıb. Əhali qrupu üzrə enerji haqqının ən yüksək ödənişi Sumqayıt ŞEŞ-də (134,2%), ən aşağı göstərici isə Sabirabad REŞ-də (48,3%) müşahidə olunub.

Qeyd edək ki, ilin ilk 9 ayında ümumilikdə 4 708 mln. kVt/saatdan artıq elektrik enerjisi istehlak edilib, bu dövrdə ümumi ödəniş 7 faiz bəndi artaraq 92%-ə çatıb. Əhali qrupu üzrə istehlak isə 1 718,4 mln. kVt/saat olub, ödəniş 3,5 faiz bəndi artaraq 80%-ə yaxın olub.

Hesabat dövründə enerji haqqına görə ödənişin ən yüksək səviyyəsi Sumqayıt (132,3%), ən aşağı - Sabirabadda (54,1%) qeydə alınıb.