Sənaye və energetika

Ana səhifə

Azərbaycan iki ildən sonra metanol istehsalına başlayacaq

10 noyabr 2010 11:10 (UTC +04:00)

Bu barədə «APA-Economics»ə açıqlamasında «Azerbaijan Methanol Company» MMC-nin (AzMeCo) baş direktoru Yadulla Xələfov məlumat verib.

Onun sözlərinə görə, hazırda zavodda birinci xəttin inşası aparılır ki, burada məhz metanol istehsal olunacaq, perspektivdə isə daha 5 xətt istismara veriləcək və həmin xətlərdə karbamid, ammoniak, asitsil turşusu, poliester və neylon istehsalı nəzərdə tutulub: «Birinci xətti 2012-ci ildə, ikinci xətti isə daha sonra, layihə üzrə 1,5-2 il müddətinə istismara vermək niyyətindəyik».

Y.Xələfov onu da qeyd edib ki, zavodda əsas 6 xətt olacaq və ümumiyyətlə müəssisə ətraf mühitə heç bir mənfi təsir göstərməyəcək. Belə ki, istehsalat prosesində tullantı qazları (CO2) müəssisə tərəfindən istifadə olunacaq: «Bu həm ekoloji baxımdan, həm də iqtisadi baxımdan çox əlverişlidir».

AzMeCo rəsmisi həmçinin bildirib ki, metanol gələcəyin yanacağı sayılır və ümumiyyətlə, bu yanacaq istifadə olunarkən suya çevrilir.

İxraca gəldikdə isə, Y.Xələfov qeyd edib ki, bu, çox zəruri məsələdir və ixracın təşkili planlaşdırılır: «Biz Avropa və Asiya ölkələrinə metanol ixrac edəcəyik. Artıq bir neçə ölkədən bizə metanolun alınmasına dair müraciət daxil olub. Ümumiyyətlə, metanola olan tələbat getdikcə artır».

Qeyd edək ki, metanol əsasən ev təsərrüfatlarında və aqrar sektorda istifadə olunur.

Xatırladaq ki, ötən il Avropa Yenidənqurma və İnkişaf Bankı (AYİB) və AzMeCo arasında 120 mln. ABŞ dolları həcmində kredit sazişi və Qaradağ rayonunda 25 ha ərazidə metanol zavodu və aralıq qazları istehsal edən əlavə 5 zavodun (xəttin) inşasına dair niyyət müqaviləsi imzalanıb. Layihə çərçivəsində şirkətin tikməyi planlaşdırdığı 6 zavodun ümumi layihə dəyəri 1,1 mlrd. dollar təşkil edəcək. Vəsaitin 33%-ni AYİB, qalanını isə digər banklar ayıracaq.

Birinci mərhələdə inşa olunacaq metanol zavodunun inşası layihəsinin ümumi dəyəri 300 mln. dollardır. Digər zavodlara gəlincə, ikinci 400 mln. dollar, üçüncü 250 mln. dollar, dördüncü 30 mln. dollar, beşinci 100 mln. dollar, altıncı zavod isə 30 mln. dollara başa gələcək.

Qeyd edək ki, AzMeCo şirkəti təbii qazın emalı yolu ilə illik istehsal gücü 720 min ton, gündəlik gücü 600 tona qədər ammoniak, 1 150 tonadək karbomid istehsal edən zavodun tikintisi və istismarının operatorudur. Gələcəkdə istifadəyə veriləcək metanol zavodu sonrakı mərhələlərdə 450 tonadək sirkə turşusu, 500 tonadək dimetil efir, 80 tonadək formaldehid, 40 tonadək melmin istehsal edəcək. Layihəni AYİB-lə yanaşı Azərbaycan Beynəlxalq Bankı, EDC (Kanada) və Qara Dəniz Ticarət və İnkişaf Bankı maliyyələşdirir.

Xatırladaq ki, AYİB krediti iki tranşla ayıracaq. Belə ki, ilk tranş 9 ilədək müddətə 90 mln. dollar həcmində ilkin tələbli borc, ikinci tranş isə 10 ilə tam geri qaytarılacaq 30 mln. dollar həcmində ilkin tələbli fəaliyyətdən asılı maliyyə vəsaiti olacaq.