Sənaye və energetika

Ana səhifə

Günter Ottinger: “Cənub dəhlizi” Avropa İttifaqının enerji infrastrukturunun inkişafı üzrə prioritetlərindən biridir

18 noyabr 2010 08:34 (UTC +04:00)

Bakı. Viktoriya Dementyeva - APA-Economics. Avropa İttifaqı (Aİ) növbəti iki onillik üçün enerji infrastrukturunun inkişafı üzrə öz prioritetlərini açıqlayıb.

“APA-Economics”in xəbərinə görə, prioritetləri noyabrın 17-də Brüsseldə Aİ-nin energetika məsələləri üzrə komissarı Günter Ottinger təqdim edib.

Onun sözlərinə görə, “ağıllı” elektrik şəbəkələrinin inkişafına, şoselərin elektrik təchizatına, yeni neft və qaz kəmərlərinə 270 mlrd. dollar sərmayə qoyulacaq.

G.Ottinger Aİ-nin prioritet saydığı və yaxın illərdə məşğul olmağı planlaşdırdığı bir neçə layihənin adını açıqlayıb. Onlardan biri Xəzər regionundan Avropaya qaz nəqlini nəzərdə tutan “Cənub dəhlizi” layihəsidir: “140 ildir ki, Azərbaycandan Avropaya neft nəql olunur. Bu isə qazın nəqlini də mümkün edir”.

Avrokomissar Aİ-nin enerji infrastrukturunun inkişafının vacibliyini vurğulayaraq, ölkələri resurslarını birləşdirməyə və layihələrin reallaşdırılmasını tezləşdirməyə çağırıb.