Sənaye və energetika

Ana səhifə

Roland Kobia: “Şahdəniz-2” layihəsi başlanan vaxt Avropada qaza tələbat daha böyük olacaq”

18 noyabr 2010 15:07 (UTC +04:00)

“APA_Economics”in xəbərinə görə, bu açıqlamanı Avropa İttifaqının Azərbaycandakı nümayəndəliyinin rəhbəri, səfir Roland Kobia bu gün keçirdiyi mətbuat konfransında səsləndirib.

Aİ-nin 2020-ci ilədək Enerji Paketini təqdim edən (“Cənub dəhlizi” layihəsi də Aİ-nin prioritetləri siyahısına daxil edilib) R.Kobia bildirib ki, Avropa da, Azərbaycan da enerjidaşıyıcılarının marşrutlarının diversifikasiyasında maraqlıdır: “Yeni istehlakçılar axtarışı da enerji bazarında qiymətləri Azərbaycan üçün daha sərfəli edir. Rusiya Azərbaycan qazı üçün əvvəlkindən daha çox pul ödəyir”.

Səfir qeyd edib ki, “Cənub dəhlizi” layihəsinin reallaşdırılması “Şahdəniz-2” layihəsinin başlanması ilə əlaqələndirilir: “Biz istəyirik ki, “Cənub dəhlizi” kəməri 2016-2017-ci ilə - “Şahdəniz-2” layihəsinin başlanmasına qədər hazır olsun. Bütün araşdırmalar göstərir ki, həmin vaxt Avropada enerjidaşıyıcıları istehsalı azalacaq və qaza daha böyük tələbat olacaq”.

R.Kobia bildirib ki, Aİ-nin prioritet layihələri siyahısına “Nabucco” və İTGİ (İtalia-Greece İnterconnector) layihələri də daxildir: “Məhz strateji “Nabucco” layihəsinin reallaşması Azərbaycana nəhəng qaz tranzitçi ölkəsinə çevrilmək imkanı verəcək. Əgər Azərbaycan “Nabucco” kəmərini qazla tam doldura bilməsə, o zaman Qazaxıstan, Türkmənistan kimi ölkələr də layihəyə qoşula bilər”.

Jurnalistlərin suallarını cavablandıran səfir İranın hazırda “Nabucco” layihəsinə qoşulmasının mümkünsüz olduğunu söyləyib: “Avropa İttifaqı İrana qarşı yeni sanksiyalar tətbiq edib. İran böyük qaz ehtiyatlarına malik olsa da, ölkədə siyasi vəziyyət stabilləşməyincə, onun layihədə iştirakı mümkün deyil”.