Sənaye və energetika

Ana səhifə

Azərbaycanda xarici neft şirkəti işçilərinə məcburi qaydada 5,4 mln. manat ödəməli olub

19 noyabr 2010 08:36 (UTC +04:00)

Pozuntunu Azərbaycan Əmək və Əhalinin Sosial Müdafiəsi Nazirliyi Dövlət Əmək Müfəttişliyinin 1 saylı Regional İdarəsi aşkarlayıb.

İdarənin rəisi Araz Bayramzadə «APA-Economics»ə bildirib ki, dövlət nəzarəti tədbirləri aparılan zaman məlum olub ki, şirkətin 2000-dən artıq işçisinin maaşları hesablananda «dəniz əmsalı» nəzərə alınmayıb. Xatırladaq ki, qanunvericiliyə görə, dənizdə işlərə görə əmək haqqı hesablananda bu məbləğin üzərinə 75% əlavə olunmalıdır. Araşdırma göstərib ki, maaşların düzgün hesablanmaması nəticəsində şirkətin 2000 işçisi ümumilikdə 5,4 mln. manat az əmək haqqı alıb: «Qanunvericiliyə uyğun tədbirlər artıq görülüb və bunun nəticəsi olaraq işçilərə ödənilməmiş 5,4 mln. manat işçilərə qaytarılıb».

Bununla yanaşı, şirkət əvvəlcə Əmək Müfəttişliyinin maaşların ödənilməyən hissəsinin ödənilməsi barədə tələbini və cərimə tətbiqi ilə bağlı qərarını yerinə yetirməkdən imtina edərək məhkəməyə müraciət edib. Ali Məhkəməyədək davam edən məhkəmə araşdırması nəticəsində Müfəttişliyin haqlı olduğu aydınlaşıb. Ali Məhkəmənin Mülki İşlər üzrə Məhkəmə Kollegiyası Dövlət Əmək Müfəttişliyinin qərarını qüvvədə saxlayıb və onu icraya yönəldib. Nəticədə, maaşlardan əlavə şirkət dövlətə 30 min manata yaxın məbləğdə cərimə də ödəyib.

İdarə rəisinin sözlərinə görə, bununla bağlı başqa şirkətlərdə də araşdırmalar aparılacaq. Artıq bununla bağlı müraciətlər də var. Ən çox müraciət zərərli iş şəraiti olan və neft sektorunda çalışan şirkətlərə aiddir. Onların əksəriyyətinin işçiləri dənizdə işlədiyinə görə onların maaşları hesablananda «dəniz əmsalı»nın nəzərə alınmasıyla bağlı problemlər yaranır. Yeri gəlmişkən, belə mübahisələr yarananda işəgötürən şirkətlər işçilərlə müqavilədə nəzərdə tutulan əmək haqqında bu məbləğin nəzərə alındığını əsas gətirirlər: «Amma qanunvericilik deyir ki, əmək müqaviləsində bu məsələ ayrıca bəndlə göstərilməlidir, bunu etməyənlər pozuntulara yol vermiş olurlar».