Sənaye və energetika

Ana səhifə

Polşanın iqtisadiyyat naziri: “Sarmatiya” layihəsinə yenidən baxılmalıdır”

24 noyabr 2010 10:11 (UTC +04:00)

Bakı. Əli Əhmədov - APA-Economics. Odessa-Brodı-Qdansk neft kəməri (“Sarmatiya”) layihəsinə yenidən baxılmalı və bu günün reallıqlarına uyğunlaşdırılması üçün işlər görülməlidir.

“APA-Economics”in xəbərinə görə, bu bəyanatla Polşa baş nazirinin müavini, iqtisadiyyat naziri Valdemar Pavlak Azərbaycan-Polşa hökumətlərarası komissiyasının Bakıda keçirilən iclasında çıxış edib.

Azərbaycanın sənaye və energetika naziri Natiq Əliyev isə bildirib ki, Polşa “Sarmatiya” layihəsinin maliyyələşdirilməsi ilə bağlı Avropa İttifaqı ilə danışıqlar aparır.

Qeyd edək ki, uzunluğu 667 km olan Odessa-Brodı kəməri 2001-ci ildə tikilib. Layihənin ümumi dəyəri 200 mln. ABŞ dolları təşkil edib. Xəzər neftinin Avropaya nəqli üçün nəzərdə tutulan kəmər 2004-cü ildən revers rejimində işləyərək Rusiya neftini nəql edir. 2007-ci ilin oktyabrında Azərbaycan, Gürcüstan, Ukrayna, Polşa və Litva Bakı-Odessa-Brodı-Plotsk-Qdansk neft kəmərinin layihələndirilməsi və tikintisi üçün birgə müəssisə yaradılması haqda saziş imzalayıb. Polşanın «Sarmatiya» boru kəməri müəssisənin bazasında yaradılan eyniadlı Polşa-Ukrayna birgə konsorsiumuna 2008-ci ilin yanvarında Azərbaycan Dövlət Neft Şirkəti, Gürcüstanın Neft-Qaz Korporasiyası və Litvanın «Klaipedos Nafta» şirkəti də daxil olub. 2011-ci ildə tikintisi başa çatacaq kəmər vasitəsilə ildə 40 mln. ton Xəzər neftinin nəqli planlaşdırılır.