Sənaye və energetika

Ana səhifə

ARDNŞ-in birinci vitse-prezidenti Xoşbəxt Yusifzadə: ««Ümid» yatağında 200 milyard kubmetr qaz, 30-40 milyon ton da kondensat ehtiyatı var»

24 noyabr 2010 21:04 (UTC +04:00)

Bakı-APA. «Əldə olunmuş geofiziki məlumatların və süxur nümunələrinin təhlilinin nəticələrinə əsasən yüz faiz əminliklə deyə bilərik ki, biz burada böyük yataq açmışıq. İndi qətiyyətlə deyə bilərik ki, burada 200 milyard kubmetr qaz, 30-40 milyon ton da kondensat ehtiyatı var. Hələlik əldə olunmuş məlumata görə, ikisi bir yerdə 250 milyard kubmetr edir». ARDNŞ-in birinci vitse-prezidenti Xoşbəxt Yusifzadə prezident İlham Əliyevin Xəzər dənizində “Ümid” qaz yatağının açılması münasibətilə Dövlət Neft Şirkətinin rəhbərliyi ilə görüşündə belə bəyan edib.

Xoşbəxt Yusifzadə bu istiqamətdə görüləcək işlərdən də danışıb: «İndi qarşımızda bu yataqdan 8-ci horizontu açmaq vəzifəsi durur. Birinci quyunu qazarkən müəyyən təcrübə toplamışıq. Burada ikinci quyunu qazmaq, əlbəttə bizim üçün asan olacaq. Mütəxəssislərimiz birinci quyuda bir dərs keçdilər. Çünki təcrübəmizdə belə bir hadisə yox idi. İndi bu quyudan aldığımız nəticə bizə nəyi vəd edir? Əvvəla, biz bu sahədə kəşfiyyat işlərini davam etdirməli, o biri quyuları da qazmalıyıq.
Amma ən vacib məsələlərdən biri də budur: bu quyunun perspektivli olması sübut edir ki, buradakı “Babək” yatağı “Ümid”dən iki dəfə böyükdür. “Ümid”də yaxşı nəticə almağımız o deməkdir ki, “Babək”in perspektivliliyi iki dəfə artıqdır. Ona görə ki, bu strukturda “Babək” aşağıda yerləşdiyi üçün onun ehtiyatı 2 dəfə çoxdur. Yəni, “Ümid”də ehtiyatlar 200 milyard kubmetr olacaqsa, “Babək”də bu, 400 milyard kubmetr olacaqdır, yaxud 300 milyard kubmetr olacaqsa, müvafiq surətdə 600 milyard kubmetr təşkil edəcəkdir. İndi “Ümid” yatağında bizim bir quyumuz var. Bu quyu dənizdə suyun dərinliyi 170 metr olan sahədə qazılıb. İnşallah həmin quyunu istismara verəndən sonra işlərimizi davam etdirərik. Hesab edirəm ki, yaxşı nəticələrə nail olsaq, həm təcrübəmiz artacaq, həm də “Babək”də də işləri özümüz görəcəyik.
Ümumiyyətlə, əldə olunmuş nəticələrə əsasən əminliklə deyə bilərəm ki, əgər bizim 2 trilyon kubmetr təsdiq edilmiş qaz ehtiyatımız varsa, ən azı 2 trilyon kubmetr də perspektiv ehtiyatımız olacaq», deyə o bildirib.