Sənaye və energetika

Ana səhifə

Avropa İttifaqı: Azərbaycan “Cənub dəhlizi”ndə vacib rol oynayır

20 oktyabr 2011 09:40 (UTC +04:00)

Bakı. Nicat Mustafayev - APA-Economics. Bu gün Bakıda Qara dəniz və Xəzəryanı dövlətlər və onlarla qonşu ölkələrlə Avropa İttifaqı arasında energetika sahəsində əməkdaşlıq proqramı (INOGATE) çərçivəsində dəyirmi masa keçirilib.

«APA-Economics»in məlumatına görə, tədbirdə çıxış edən Azərbaycan sənaye və energetika nazirinin müavini Natiq Abbasov ölkənin energetika sahəsinin inkişafından danışıb və bildirib ki, 2010-cu ildə Azərbaycanda 50 mln. tondan çox neft və 26 mlrd. kubmetr qaz hasil edilib: «Qaz sahəsində yeni yataqların aşkarlanması Azərbaycanı qaz idxalçısından ixracatçıya çevirib və ölkə özünün enerji təhlükəsizliyini tam təmin edib. Hazırda ölkənin qaz ehtiyatları 2,5 trln. tondan artıqdır. Azərbaycan elektroenergetika və bərpa olunan enerji sahələrinin də inkişafı istiqamətində tədbirlər həyata keçirir».

Tədbirdə çıxış edən Avropa İttifaqının Azərbaycandakı nümayəndəliyinin energetika sahəsi üzrə məsləhətçisi xanım Edita Novak INOGATE proqramının əhəmiyyətindən, proqram çərçivəsində ayrılan texniki yardımlardan danışıb və qeyd edib ki, bu proqramın başlandığı gündən Azərbaycan proqramda aktiv iştirak edir: «Ümumiyyətlə, Azərbaycan “Cənub dəhlizi”ndə vacib rol oynayır».

Tədbirdə çıxış edən Azərbaycan Sənaye və Energetika Nazirliyinin İnvestisiya və sənaye obyektlərinin yenidən qurulması şöbəsinin müdiri, INOGATE proqramının Azərbaycan üzrə koordinatoru Ramiz Rzayev proqram haqqında məlumat verərək bildirib ki, 1996-cı ildən başlayan proqram çərçivəsində 56 layihə icra olunub və Azərbaycan bu layihələrin 30-da iştirak edib: «Hazırda proqram çərçivəsində 9 layihə icra olunur ki, Azərbaycan bunların da əksəriyyətində iştirak edir. Bu layihənin ümumi dəyəri 36,5 mln. avroya yaxındır. INOGATE başlandığı vaxtdan indiyədək 56 layihənin icrasına Avropa İttifaqı tərəfindən 125 mln. avro məbləğində texniki yardım göstərilib. Cari ilin sonunadək daha bir layihəyə start veriləcək ki, bunun da icrasına təxminən 17 mln. avro ayrılacağı gözlənilir».

R.Rzayevin sözlərinə görə, proqram çərçivəsində icra olunan layihələrə orta hesabla ildə 40 mln. avro vəsait ayrılır: «Növbəti illərdə proqramın fəaliyyəti və ayrılan vəsaitin artırılması nəzərdə tutulub».

R.Rzayev qeyd edib ki, Azərbaycanda proqram çərçivəsində icra olunan layihələr sırasına enerji sahəsində qanunvericiliyin uyğunlaşdırılması, neft-qaz sahəsində standartların uyğunlaşdırılması və. s aiddir.

Qeyd edək ki, INOGATE proqramında Azərbaycan, Gürcüstan, Ermənistan, Ukrayna, Belarus, Moldova, Qazaxıstan, Türkmənistan, Özbəkistan, Qırğızıstan və Tacikistan iştirak edir. Rusiya və Türkiyə isə proqramda müşahidəçi statusunda çıxış edir.