Sənaye və energetika

Ana səhifə

Gəncə Alüminium Kompleksinin I mərhələsinin tikintisi başa çatıb

21 oktyabr 2011 15:06 (UTC +04:00)

Bakı. Əli Əhmədov - APA-ECONOMICS. Noyabr ayından etibarən Azərbaycan dünya bazarına A-7 markalı yüksək keyfiyyətli alüminium külçələrin satışına başlayacaq. Ölkənin metallurgiya sənayesində ən böyük layihələrdən biri, illik istehsal gücü 100 min ton olan Gəncə Yeni Alüminium Kompleksinin tikintisinin I mərhələsi başa çatıb və oktyabrın 1-dən kompleks fəaliyyətə başlayıb.

Layihəni reallaşdıran «Det-Al» alüminium şirkətindən «APA-ECONOMICS»ə verilən məlumata görə, I mərhələnin istehsal gücü ildə 50 min ton alüminium təşkil edir.

Qeyd edək ki, kompleksin tikintisinə 2008-ci ilin martından başlanıb. Təməlqoyma mərasimində prezident İlham Əliyev də iştirak edib. Yeni kompleks dünyanın ən müasir texnologiyalarına əsaslanaraq inşa edilib. Mühəndis layihələndirilməsi işlərini dünyanın aparıcı şirkəti olan GAMİ şirkəti, tikinti işlərini isə son 35 ildə 45-dən çox zavodun “açar təslimi” inşaatını həyata keçirmiş Çinin SMEC şirkəti yerinə yetirib.

Müasir texnologiyaların tətbiqi xammal və elektrik enerjisindən daha da səmərəli istifadəni təmin edir: «Belə ki, burada 1 ton alüminiumun istehsalına 13,5 min kVt/saat elektrik enerjisi sərf edilir, bu da hazırda MDB məkanında fəaliyyət göstərən oxşar müəssisələrlə müqayisədə təxminən 6 min kVt/saat azdır».

Kompleksin gözlənilən tikinti və istismar dövrü üçün ətraf mühitə təsiri, atmosferə atılan tullantıların gözlənilən miqdarı araşdırılıb, texnologiya seçilərkən regionun iqlim xüsusiyyətləri nəzərə alınıb. Kompleksdə tətbiq edilən müasir quru qaz təmizləmə sistemləri elektroliz prosesi zamanı yaranan tullantıların 98,5%-nin atmosferə buraxılmasının qarşısını alır.

Alüminium Kompleksinin I fazası olan illik 50 min ton ilkin alüminium zavodunun işə başlanması nəticəsində Gəncədə 600 nəfər işlə təmin olunub. Burada işçilərə xüsusi təlimlər keçirilir, bilik səviyyələrinin artırılmasına yönəldilmiş proqramlar alüminium istehsalı sahəsində gənc peşəkar kadrların yaranmasına zəmin yaradır. Kompleksdə qurulan avtomatik nəzarət sistemi elektroliz təknələri və digər avadanlıqları avtomatik idarəetmə sistemi ilə 24 saat daim nəzarətdə saxlayır.

Hazırkı mərhələdə “Det-Al” Alüminium Kompleksində 50 min ton ilkin alüminium istehsal edən Elektroliz zavodu, Anod prosesləri zavodu, İsti metal tökmə və fasiləsiz yayma zavodu, 110 kVT-luq yarımstansiya, Silisium düzləndirici yarımstansiya, Elektroliz zavodunun idareetmə mərkəzi, Gil-torpaq qəbul və nəqli sahəsi, Quru qaz təmizləmə sahəsi, kompressor sahəsi, Dövrü su sistemləri və soyutma qüllələri, Qaz paylayıcı stansiya, Yanğın söndürmə sistemləri, Fülorid, Anod və Katod karbon bloku anbarları, Administrativ ofis binası, Laboratoriya binası, Yeməkxama və Məişət binası, Tibb məntəqəsi və digər yardımçı sex və təsərrüfat binaları tikilərək istifadəyə verilib.

Oktyabrın 1-dən başlayan elektroliz prosesi texnologiyaya əsasən növbəti 40-50 gün ərzində tam istehsalat səviyyəsinə çatacaq və 2011-ci ilin noyabr ayında “DETAL AZE” ticarət nişanlı yüksək keyfiyyətli A-7 markalı alüminium külçələri satış məqsədilə dünya bazarına çıxarılacaq.